Қазақстанның үздік теннисшісі “Ролан Гарроста“ қанша табыс тапты?

Жұптық сында Қазақстанның бірінші ракеткасы Анна Данилина жартылай финал жолдамасы сарапқа салынған матчте есе жіберіп, аралас сындағы (микст) "Ролан Гаррос" турнирін аяқтады, деп хабарлайды Tengri Sport.

Америкалық теннисші Джеймс Трейсимен жұп құраған қазақстандық спортшы италиялық Сара Эррани мен Андреа Вавассори жұбына қарсы ойнады.

Кездесу 59 минутқа созылып, 2:0 (6:2, 6:2) есебімен италиялық дуэттің пайдасына аяқталды.

Ролан Гаррос турнирінің аралас сынында ширек финалға шыққаны үшін жұпқа 17,5 мың еуро (шамамен 10 миллион теңге) көлемінде сыйақы қарастырылған. Бұл Данилинаның аталған турнирде кем дегенде 8750 еуро (шамамен 5 миллион теңге) табыс тапқанын білдіреді.

Айта кетейік, қазақстандық теннисші "Ролан Гаррос" турнирінің әйелдер арасындағы жұптық сынында өнер көрсетуін жалғастырады. 3 маусымда ол сербиялық Александра Круничпен бірге аустралиялық Эллен Перес пен нидерландық Деми Схюрс жұбына қарсы матч өткізеді.

Осы кездесудің жеңімпаздары "Ролан Гаррос" турнирінің жартылай финалына жолдама алады.