Мбаппе Мао Цзэдун туралы мемге қатысты даудан кейін мәлімдеме жасады

Видеодан кадр / Фото © Tengrinews.kz / Болат Айтмолда

Мадридтік "Реал" мен Франция құрамасының жұлдызы Килиан Мбаппе "қытайлық диктатор" туралы айтқан сөздері үшін кешірім сұрады. Қытайдың бірнеше бренді футболшымен келісімшартты тоқтатып үлгерген, деп хабарлайды Tengri Sport.

Дау әлеуметтік желілерде Мбаппенің өзіне қатысты ең күлкілі мемді таңдаған сұхбаты жарияланғаннан кейін басталды. Футболшы өзінің беті Мао Цзэдунмен біріктірілген суреттерді ерекше атап өтіп, оны "қытайлық диктатор" деп атаған.

Видео кең таралғаннан кейін Қытайдың екі бірдей ірі бренді Мбаппемен келісімшартты тоқтататынын жариялады. Бұдан бөлек Қытай телевизиясы Испания футбол чемпионатының матчтерін көрсетуді тоқтату туралы шешім қабылдады.

Мбаппенің Қытаймен дауы: футболшы кешірім сұрады

Мбаппе оның сөздері Қытай тұрғындарының намысына тиюі мүмкін екенін мойындап, кешірім сұрады.

"Жақында берген сұхбатымда мен өзім басты кейіпкер болған суретке пікір білдірдім. Енді менің ескертулерім орынсыз болғанын түсінемін. Бұл сөздер Қытайдағы көптеген адам мен бүкіл әлемдегі қытай қауымдастықтарының көңіліне қаяу түсірді.

Менің сөздерім ренжіткен жандардың барлығынан кешірім сұраймын. Бұл менің жоспарымда болмаған еді. Мен Қытай халқына және оның тарихына зор құрметпен қараймын!" – деп жазды Мбаппе әлеуметтік желідегі парақшасында.

Ла Лига президенті Хавьер Тебас та кешірім сұрауды жөн көрді.

"LaLiga Килиан Мбаппенің сөздерінен кейін Қытайда туындаған реніш пен наразылыққа өкініш білдіреді. Біз бұл мәлімдемелер келтірген залалды түсінеміз. LaLiga атынан Қытай халқынан шын жүректен кешірім сұраймын.

Көптеген жылдар бойы біз Қытаймен, оның мемлекеттік ведомстволарымен, спорт ұйымдарымен, аудиовизуалды БАҚ-тарымен және испан футболын сүйетін миллиондаған жанкүйермен өзара құрметке, сенімге және ынтымақтастыққа негізделген қарым-қатынас орнаттық. Жекелеген тұлғалардың әрекеттері бұл қарым-қатынасқа нұқсан келтіруіне, сондай-ақ соның салдарынан біздің кәсіби жарыстарымызға қатысатын 20-дан аса клуб пен миллиондаған қытайлық жанкүйердің зардап шегуіне жол бере алмаймыз", – деп мәлімдеді ол әлеуметтік желіде.

Айта кетейік, Килиан Мбаппе – әлемдегі ең танымал футболшылардың бірі. Мадридтік "Реал" форварды әлеуметтік желідегі оқырмандар саны бойынша тек үш ойыншыға жол береді: Криштиану Роналду, Лионель Месси және Неймар.

Мбаппе түрлі диктатор бейнесінде бейнеленген мемдерге келетін болсақ, олар футболдан Әлем чемпионаты кезінде зор танымалдылыққа ие болды. Жанкүйерлер Килианның құрамадағы серіктестерін басқаруға тырысатынын бірнеше рет байқаған, бұл шабуылшының диктаторлармен салыстырылуына себеп болды.

🚨 Kylian Mbappé 🇫🇷 : « Mon meme préféré sur ma personne ? ? Celui où ils mettent mon visage sur un dictateur chinois (Mao Zedong). 🇨🇳 Ça me fait vraiment rire, je l’utilise tout le temps avec mes amis. » 😭😭 (@Thebridge_show) https://t.co/7m3TOH3duC
— BeFootball (@_BeFootball) 26 қазан, 2026 жыл