Шымкенттік бапкер матч кезінде қызды ұрып жіберген: тергеу басталды

Видеодан алынған кадрлар

Павлодарда өтіп жатқан жекеменшік әйелдер командалары арасындағы волейболдан Қазақстан біріншілігі кезінде шымкенттік бапкер қызды ұрып жіберген. Өңірлік Полиция департаменті өкілдері осы жағдайға қатысты пікір білдірді, деп хабарлайды Tengri Sport.

Резонанс тудырған видео: мән-жайы

Әлеуметтік желіде тараған видеодағы оқиға 26 қазанда болған. Видеода бапкер өз командасының 9-нөмірлі ойыншысын алаң жиегіне шақырып алып, басынан ұрғаны көрінеді.

Бұған дейін Павлодардағы турнирге 2012-2013 жылдары туған қыздар қатысып жатқаны хабарланған болатын.

Полиция не деді?

Павлодар облысы Полиция департаментінің баспасөз қызметі мәліметінше, Шымкенттен келген жекеменшік волейбол командасының бапкері Х.М. ұсталған.

"Бапкер волейбол командасының кәмелетке толмаған қатысушысына күш қолдануына қатысты соталды тергеу басталды. Оқиғаға қатысушылар анықталып, Павлодар қалалық полиция бөліміне жеткізілді. Қазір тергеу жүргізіліп жатыр", - деп мәлімдеді Павлодар облысы ПД өкілдері.

Бапкердің әрекетіне еліміздің заңнамасына сәйкес құқықтық баға берілетіні айтылды.

Бұған дейін Қазақстан волейбол федерациясының тәртіптік комитеті маманды екі жыл бойы кез келген волейбол жарысына қатыстыруға тыйым салу туралы шешім қабылдағаны хабарланған еді.

Шымкенттік бапкер матч кезінде қызды ұрып жіберген: қандай жаза қолданылғаны белгілі болды