“Қиындықтарға тап болдым“: Қазақстаннан шыққан киберспорт жұлдызы лудоманияға шалдыққанын мойындады

CS2 ойыны бойынша magic командасының мергені, қазақстандық ойыншы Әбдірахим mo0N Иса Tengri Sport тілшісіне берген сұхбатында лудоманиядан зардап шеккені туралы ашық айтып берді.

Қазақстандық ойыншы өмірінде өте ауыр сынақтар болғанын айтты.

Соның бірі – Абдурахим 15 пен 18 жас аралығында бетпе-бет келген лудомания дерті.

Осының салдарынан оның мойнында көптеген қарыз жиналып, бұл жағдай оған психологиялық тұрғыдан қатты әсер еткен.

Фото © Tengrinews.kz

Алайда көп ұзамай мәселенің түйіні тарқатылды. Абдурахим RUBY (киберспорттық ұйым) клубымен келісімшартқа отырмас бұрын ұйым иесіне жағдайын айтқан, ал ол ойыншының қарыздарының басым бөлігін төлеуге көмектескен.

"15 пен 18 жас аралығында үлкен қиындықтарға тап болдым. Бұл бәс тігумен (ставка) байланысты еді. Содан болар, ата-анам мені жіберді (еркіме қойды) деп ойлаймын", - деп ағынан жарылды Абдурахим.

– Сенде тәуелділіктің қандай да бір түрі болды ма?

– Иә, қарызға баттым. RUBY-ді құрған адам қарыздарымның көп бөлігін жауып берді. Мен оған басымдағы мәселелерді бірден айттым, ол да бірден көмектесті. Содан кейін ойнай бастадым, қарыздарымды біртіндеп өтеп, ақыры құтылдым. Міне, осындай оқиға болды.

– Қазір бәрі жақсы ма?

– Иә. Білесіз бе, мен тек ойынға берілгенім сондай, бәс тігу туралы ойламадым да. Ол кезде мен Қазақстанның топ-1 ойыншысы болған едім. Өте аз ұйықтап, үнемі ойнайтынмын. Ойын, тамақ, ұйқы – күндерім осылай өтіп жатты.

Абдурахим RUBY командасына 2024 жылдың қаңтарында қосылғанын және бұл оның жалақы төленетін келісімшартқа отырған алғашқы кәсіби ұжымы болғанын айтты.

Ол бұл клубқа университет студенттері арасында өткен халықаралық CS турнирінен кейін қабылданған.

"Бұл университет ойыншылары арасындағы қазақстандық іріктеу кезеңінде жеңіске жеткен кезіміз еді. Біз жеңімпаз атанып, Қазақстан атынан Мәскеуге ұштық. Ол жақта Беларусь, Ресей және басқа да көптеген ел болды. Топтық кезеңде Беларусь командасына қарсы ойнадық. Бір беларусь азаматы матчті тамашалап отыр екен. Ол өз командасына жанкүйер болды. Біз олардан жеңілдік, бірақ мен өте жақсы өнер көрсеттім. Сол кісі кейін маған хабарласты, ол RUBY командасының иесі болып шықты", - дейді mo0N.

mo0N деген кім?

Еске сала кетейік, Әбдірахим mo0N Иса magic клубында мерген ретінде өнер көрсетеді.

PGL Astana турнирі қазақстандық ойыншының мансабындағы алғашқы жоғары санатты жарыс болды. Оның командасы жартылай финалға дейін жетіп, онда әлемнің ең мықты клубтарының бірі - Team Falcons-пен кездесіп, есе жіберді.

Кейінірек үшінші орын үшін өткен матчте қазақстандықтың командасы MOUZ клубынан 2:0 (13:2, 13:7) есебімен жеңілді. Қола жүлде иегерлері 192 мың доллар (90,3 миллион теңге) табыс тапты.

PGL Astana турнирінде иеленген төртінші орны үшін Абдурахим magic командасымен бірге өзінің ең ірі гонорарын алды – командаға 56 мың доллар (27 миллион теңгеден астам) және дәл осындай сома киберспорттық ұйымға берілді.

Қазақстандық киберспорттың жаңадан шығып келе жатқан жұлдызы - Әбдірахим mo0N Исамен болған сұхбаттың толық нұсқасын порталдардың бірлескен YouTube-арнасынан көріңіздер: Tengri Sport және Vesti.kz - SauBall.

Бұған дейін mo0N PGL Astana турнирі, Falcons командасымен текетірес туралы егжей-тегжейлі бөлісіп, жүлде қорына қатысты пікір білдірген болатын..