+7 (777) 001 44
99
Хамитжанов клубтың баспасөз қызметіне берген ауқымды сұхбатында команданың қаржылық жағдайы қиындығына қарамастан, қолдау көрсетіп жүрген жанкүйерлерге алғысын білдірді.
- Жанкүйерлерді ең алдымен бір мәселе алаңдатады: қалыптасқан жағдайды тұрақтандырудың нақты жолы бар ма?.
"Әрине. Біз қол қусырып отырған жоқпыз. Қалыптасқан мәселелерді шешудің жолдарын үнемі ойластырып жүрміз. Біздің басты міндетіміз – "Астана" ФК-дағы барлық үдерістің ірі еуропалық деңгейдегі клубта болуы тиіс деңгейде жұмыс істеуіне жағдай жасау. Барлық мәселе бір күнде шешіле бермейді. Бұрыннан қордаланған міндеттемелер бар, күнделікті операциялық жұмыстар бар. Сонымен қатар бүгінгі күнді ғана емес, клубтың болашағын да ойлауымыз қажет.
Алайда ең маңыздысы – бізде бұл жағдайды шешуге деген ниет бар. Диалог тұрақты түрде жүргізіліп жатыр. Біз команда, қызметкерлер, жанкүйерлер және қала алдындағы жауапкершілігімізді түсінеміз. Сондықтан жекелеген ағымдағы мәселелерді ғана шешіп қоймай, клубтың әрі қарай тұрақты жұмыс істеп, дами алуына мүмкіндік беретін жүйе қалыптастырғымыз келеді", - деп атап өтті ол.
Дегенмен клуб басшылығы командадағы мәселелер нақты қашан шешілетінін айта алмады.
- Көптен күткен инвесторды қашан көреміз?
"Біз клуб ретінде әлеуетті инвестор "Астанада" болып жатқан жағдайды барынша толық әрі объективті түсінуі үшін қолдан келгеннің бәрін жасадық. Оған клубтың қаржылық жағдайы, спорттық әлеуеті, міндеттемелері, даму мүмкіндіктері және "Астананың" әрі қарайғы даму бағыты жөніндегі көзқарасымыз таныстырылды. Қазір қажетті ақпараттың барлығы ұсынылды, ауқымды бірлескен жұмыс жүргізілді. Біз өз тарапымыздан барынша ашықпыз және бұл үдерістің сәтті әрі мүмкіндігінше тез аяқталуына мүдделіміз.
Сонымен бірге мұнда мәселе жай ғана бір адамның орнына екінші адамның келуі немесе клуб маңында жаңа тұлғаның пайда болуы туралы емес екенін түсіну керек. Біз инвестордың келуі "Астана" үшін жаңа кезеңнің бастауы болғанын қалаймыз. Бұл – басқару жүйесі түсінікті, қаржылық тұрақтылығы қамтамасыз етілген, ұзақ мерзімді стратегиясы бар және Қазақстанда ғана емес, Еуропада да ең жоғары мақсаттар қоя алатын жаңа кезең болуы тиіс. Сондықтан бұл жерде тез әрекет етуден гөрі, бәрін дұрыс жасау маңыздырақ.
Қазір жұмыс барысындағы диалог тұрақты түрде жалғасып жатыр, алдағы қадамдарға қатысты түсіністік бар. Әзірге түпкілікті шешімдер ресми түрде рәсімделмегендіктен, нақты мерзімдерді атауды немесе оқиғадан озып кетуді дұрыс деп санамаймын. Мұндай мәселелерде нәтиже өзі сөйлегені дұрыс", - деп атап өтті ол.
Instagram-дағы бұл жарияланымды көру
"Астананың" қаржылық мәселелері және клубқа қатысты уәделер
Еске сала кетейік, 2025 жылғы 30 желтоқсанда Үкіметте өткен брифингте Қазақстанның туризм және спорт министрі Ербол Мырзабосынов "Астананы" коммерцияландыру 2026 жылға жоспарланғанын және инвестор табылғанын айтқан болатын.
"Клуб Sport Qory бірыңғай операторынан қаржыландырылып келді. Биыл біз бұл клубты коммерцияландыруды жоспарлап отырмыз. Белсенді жұмыс істеп жатырмыз, инвесторлар бар. Рәсім аяқталғанша оның кім екенін жариялай алмаймыз", - деген еді ол.
Биыл қыркүйекте Tengri Sport ведомствоға сауал жолдап, әлеуетті инвестормен келіссөз жүріп жатқаны туралы жауап алған болатын. Сонымен қатар Sport Qory кейінгі жылдары "Астана" ФК-на жұмсалған қаражат көлемін ашық көрсетті.
Биыл командаға 3 миллиард теңге көлемінде қайырымдылық көмек бөлінгені, ал жалпы 2021–2026 жылдар аралығында қор желісі бойынша клубты дамытуға шамамен 32,7 миллиард теңге бағытталғаны белгілі болды. Тағы 7 миллиард теңгеге жуық қаражатты клуб УЕФА желісі бойынша алған.
Осылайша, 2021-2026 жылдар аралығында қор мен УЕФА тарапынан клуб бюджетіне 39,7 миллиард теңге түскен.
Осындай қомақты инвестицияларға қарамастан, "Астана" ФК кейінгі бір жылда қаржылық қиындық туралы бірнеше рет мәлімдеді. Клуб футболшылар алдында жалақы бойынша берешек бар екенін растады.
"Астана" - Қазақстандағы ең титулды команда
Еске сала кетейік, "Астана" - елдің жеті дүркін чемпионы, футболдан Қазақстан кубогінің үш дүркін иегері, сондай-ақ біздің чемпионат тарихында Чемпиондар лигасының негізгі кезеңіне шыққан алғашқы өкіл.
Бұл ретте кейінгі үш жылда команда чемпиондық атағын қайтара алмай келеді: 2023 жылы "Ордабасы", ал 2024 және 2025 жылдары "Қайрат" чемпион атанды. Биыл да "Астана" үшінші орында келеді және алтын медальдан үмітін үзуге жақын, сонымен қатар елордалық команда төртінші орындағы "Оқжетпестен" небәрі үш ұпай алда тұр.
Instagram-дағы бұл жарияланымды көру
Былтыр “Астана” жекеменшікке өтетіні айтылды: не болып жатыр?
Бұған дейін "Астана" - "Қайрат" матчінен кейін команда жаттықтырушылары арасында сырттай сөз таласы болған еді. Рафаэль Оразбахтин жеңіліспен аяқталған ойын қорытындысын "шапито" деп сипаттаса, Григорий Бабаян оған жауап ретінде әріптесін "клоун" деп атады.
