Қуат Хамитов әлеуметтік желідегі видео үшін жазаланды

Фото: instagram.com/kuat__khamitov/

Танымал MMA файтерлерінің бірі Қуат Хамитовқа Атырауда қауіпсіздік белдігін тақпай көлік жүргізгені үшін айыппұл салынды, - деп хабарлайды Tengri Sport.

Танымал MMA файтерлерінің бірі Қуат Хамитовқа Атырауда қауіпсіздік белдігін тақпай көлік жүргізгені үшін айыппұл салынды, - деп хабарлайды Tengri Sport.

Атыраудағы жекпе-жек кешін ұйымдастырушылардың әлеуметтік желілерінде Қуат Хамитовтың қызыл кабриолет тізгінінде келе жатқан видеосы пайда болды.

Видеода оператордың да, спортшының да қауіпсіздік белдігін тақпағаны әлеуметтік желі қолданушыларының назарын аударды.

Атырау полициясы бейнежазбаға қатысты тексеру жүргізіп, оған қатысушыларды жауапқа тартты.

"Атырау облысының Полиция департаменті хабарлайды: әлеуметтік желілерде жол қозғалысы ережелерінің өрескел бұзылғаны туралы бейнежазба тарады. Тексеру нәтижесінде Toyota Camry автокөлігінің 24 және 22 жастағы жолаушылары қозғалыс кезінде қауіпсіздік белдігін тақпағаны, сондай-ақ көлік терезесінен шыққандары анықталды. Олар жасаған құқық бұзушылықтары үшін әкімшілік жауапкершілікке тартылды.

Сонымен қатар, аталған заңсыз әрекеттерге жол берген көліктің 20 жастағы жүргізушісі де жауапқа тартылды. Сондай-ақ, Mustang автокөлігінің 38 жастағы жүргізушісі қауіпсіздік белдігін тақпай көлік басқарғаны үшін әкімшілік жауапкершілікке тартылды", - деп мәлімдеді өңірлік полиция өкілдері.

Хамитов жазаға қарсылық білдірген жоқ, бірақ жолда өзіне де, басқа қозғалыс қатысушыларына да ешқандай қауіп төнбегенін айтты.

"Хаттама толтырып, айыппұл салды. Бұл жұмыс барысы, жекпе-жек жарнамасының түсірілімі болатын. Белдікке келсек, ол видеодағы қозғалысыма кедергі келтірді, оның үстіне біз сағатына 30 шақырым жылдамдықпен жүрдік, бұл менің өміріме қауіп төндірген жоқ, сондықтан белдікті 10 секундқа шешуді ұйғардық. Заң бәріне ортақ, бұл әділ жаза деп есептеймін! Өзім заң бұзғанды ұнатпаймын, тек ол жерде түсірілім болды", - деді Қуат тілшімізге берген сұхбатында.

Атырау облысының полициясы барлық жол қозғалысына қатысушыларды қауіпсіздік талаптарын бұлжытпай орындауға және жол ережелерін қатаң сақтауға шақырып, әрбір заңбұзушылық үшін жауапкершілік қарастырылғанын еске салды.

Instagram-дағы бұл жарияланымды көру

Антон Бованың жарияланымы (@spor_tjob)

Еске сала кетейік, Қуат Хамитов - Қазақстандағы ең танымал MMA файтерлерінің бірі, оның Instagram-да 648 мың оқырманы бар. Ол Атырауға ирандық Али Хейбатимен жекпе-жекке шығу үшін барған.