“Оңалтудан өтіп жатыр“. Шавкат Рахмоновтың жағдайы қандай екені белгілі болды

Қазақстандық UFC файтерлерінің бапкері Эдуард Базров жеңіліп көрмеген спортшы Шавкат Рахмоновтың денсаулық жағдайы туралы айтып берді, деп хабарлайды Tengri Sport.

Tengri Sport тілшісі қазақстандық UFC файтері Шавкат Рахмоновтың денсаулық жағдайын білу үшін оның бапкері Эдуард Базровқа хабарласты. Маманның айтуынша, қалыпқа келу барысында ешқандай қосымша қиындықтар туындап жатқан жоқ, алайда оңалту мерзімі мен октагонға оралу уақыты туралы айту әзірге қиын.

"Қалыпқа келудің нақты мерзімін айта алмаймын. Себебі бұл - алдыңғы айқыш байлам. Әркімнің ағзасы әртүрлі қалпына келеді. Біреулер жарты жылда, енді бірі бір жарым жылда жазылады. Қазір ол оңалтудан өтіп жатыр. Қазіргі таңда бәрі ойдағыдай. Күтпеген жағдайлар болады деп ойламаймыз", - деді Базров Tengri Sport-қа берген сұхбатында.

Шавкат Рахмонов 2024 жылдан бері жекпе-жекке шықпады

Еске сала кетейік, қазақстандық спортшы 2024 жылдың 8 желтоқсанында өткен UFC 310 турнирінен бері жекпе-жекке шыққан жоқ. Сол кезде ол төрешілердің бірауыздан қабылдаған шешімімен ирландиялық Иэн Гэрриді жеңген болатын.

Негізінде бұл Шавкат үшін чемпиондық жекпе-жек болуы керек еді, бірақ сол кездегі белбеу иесі Белал Мухаммад жарақатына байланысты айқастан бас тартты.

Кейінірек Рахмоновтың өзі жарақаттарына байланысты жекпе-жектерден бас тартуға мәжбүр болды. Нәтижесінде елдегі ең танымал спортшылардың бірі 500 күннен астам уақыт бойы үзілісте жүр.