Криштиану Роналдудың Португалия құрамасындағы мансабы 23 жылға созылды және футбол тарихындағы ең ұзақ әрі оқиғаға толы кезеңдердің бірі ретінде қалады. Ол 234 матч өткізіп, 146 гол соқты, сондай-ақ 2016 жылғы Еуропа чемпионатында және екі мәрте Ұлттар лигасында тарихи жеңіске жетті. Криштиану дәуіріне дейін ұлттық құрама бірде-бір жүлде жеңіп көрмеген.
Криштиану өз жолын Қазақстан құрамасына қарсы ойыннан бастады
Қазіргі заманның ұлы шабуылшыларының бірі Португалия құрамасындағы алғашқы матчін 2003 жылғы 20 тамызда Португалияның Шавиш қаласындағы "Эштадиу Мунисипал" стадионында өткізді. Бұл жолдастық кездесуде Қазақстан құрамасы қарсылас атанды.
Сол кезде ағылшындық "Манчестер Юнайтедке" енді ғана ауысқан 18 жастағы Роналду негізгі құрамға енбеген еді, бірақ екінші таймның басында есеп 0:0 болып тұрғанда алаңға шықты. Сол матчте Криштиану гол соқпағанымен, оның құрамасы 64-минутта Симау Саброза соққан доптың арқасында жеңіске жетті.
Сол кездесу туралы естеліктерін Қазақстан құрамасы сапында өнер көрсеткен ойыншылардың бірі, қазіргі "Жетісу" бапкері Қайрат Нұрдәулетов Tengri Sport-пен бөлісті.
"Ол кезде бұл футболшы әлемнің ең үздік ойыншыларының біріне айналады деп ойламаппын. Иә, ойын алдында ол туралы айтылған әңгімелерді, келешегінен зор үміт күттіретін жұлдыз екенін, оған көптеген алпауыт клуб қызығушылық танытып жатқанын естігенбіз. Бірақ 20 жылдан кейін ол туралы осылай айтамын деп ойламадым.
Қарапайым жігіт, қызық шаш үлгісі бар, арықша келген. Бойында қабілет, жылдамдық, дриблинг және стандартты емес шешімдер бар екені көрініп тұрды. Бірақ оның супержұлдыз болатынын болжау мүмкін емес еді", - деді Нұрдәулетов тілшімізбен әңгімелесу барысында.
Бүгінде 43 жастағы Нұрдәулетовтің футболшы ретінде мансабын аяқтап, бапкерлікке ауысқанына 9 жыл болды, ал 41 жастағы Роналду "Әл-Наср" сапында өнер көрсетуін жалғастырып, мансабындағы 1000 гол межесін бағындырмақ.
Еуро-2016-дағы жеңіс пен ӘЧ-дағы сәтсіздіктер
Роналду құрамамен алғашқы жүлдесін 2004 жылы жеңіп алуы мүмкін еді - дебютінен кейін бір жыл өткенде команда өз еліндегі Еуропа чемпионатының финалына дейін жетті. Онда Криштиану негізгі құрамда шықты, бірақ бүкіл команда сияқты гол соға алмады, нәтижесінде португалиялықтар күтпеген жерден Грекияға есе жіберді (0:1).
Құрамамен жаңа финалды 12 жыл күтуге тура келді - 2016 жылы Францияда өткен турнирде португалиялықтар алтынға таласта алаң иелерін жеңе алды. Ойынға капитандық белгімен шыққан Роналду 25-минутта жарақатына байланысты алаңнан кетіп, соңына дейін қосалқы құрам орындығынан серіктестеріне қолдау көрсетті. Айта кетейік, сол кезде алаңда толық ойын өткізген Нани - "Ақтөбенің" болашақ футболшысы болатын.
Португалиялықтар Роналдусыз, қосымша уақытта Эдер соққан голдың арқасында жеңіске жеткен драмалық Еуродан кейін Криштиану құрамамен тағы екі финалда өнер көрсетті.
2019 жылы Португалия Ұлттар лигасының алғашқы жеңімпазы атанды, Роналду бүкіл матч бойы алаңда болды, бірақ Нидерланд қақпасына гол соға алмады.
2025 жылғы Ұлттар лигасының финалында Криштиану испаниялықтардың қақпасына ойынды қосымша уақытқа созған аса маңызды гол соғып, 88-минутта алаңнан кетті. Нәтижесінде Португалия пенальти сериясында жеңіске жетті.
Бұл ретте Криштиануда Әлем чемпионатының бірде-бір медалі жоқ. Ол қола жүлдеге 2006 жылы жақын болды - сол кезде команда 3-орын үшін өткен матчте немістерден жеңілді.
Жалпы алғанда, Роналду мундиалдарда алты рет өнер көрсетті және тарихтағы алты турнирдің барлығында гол соққан жалғыз футболшы. Роналдудың ӘЧ-дағы голдар саны - 11, бірақ оның біреуі ғана, соңғы турнирде, плей-офф кезеңінде - 1/16 финалда Хорватия қақпасына пенальтиден соғылды. Бұл доп Криштианудың құрама жейдесінде соққан 146 голының соңғысы болды.
Құрамадан даулы кету
Құрамадағы мансабының соңында Криштиану Роналду жанкүйерлер мен сарапшылар тарапынан үлкен сынға ұшырады. Бұған қарамастан, Әлем чемпионатының 1/8 финалында ұтылғаннан кейін, ол Ұлттар лигасында құрама үшін ойнауды жалғастыруға ниетті екенін мәлімдеді.
Жаңа циклдің алғашқы ойынында - Уэльс құрамасына қарсы - Криштиану негізгі құрамда шығып, гол да соқты, бірақ ол офсайдқа байланысты есептелмеді. 64-минутта ол Гонсало Рамушқа ауыстырылды - сол кезде 24 қыркүйектегі бұл ойын Роналду үшін құрама жейдесіндегі соңғы матч болатынын ешкім білмеген еді.
Келесі матчте бапкер Роналдуды қосалқы құрамда қалдырды, бірақ екінші таймда жаттығуға шығуын сұрады. Криштиану алаңға сол күйі шықпады, бұл үлкен дауға себеп болды.
Келесі ойын алдында Криштиану тағы негізгі құрамнан тыс қалғанда, 41 жастағы форвард құрама сапынан өз бетінше кетіп қалды. Осылайша оның бапкер Жорже Жезушпен қақтығысы басталды.
Криштиану жазба жариялап, онда жаттықтырушыны екіжүзділік танытты деп айыптады. Оның айтуынша, бапкер журналистерге Криштианудың неге құрамға кірмей қалғанын түсіндіріп беруге уәде берген, бірақ сөзінде тұрмаған. Жаттықтырушы бұған жауап ретінде ештеңені түсіндірмейтінін және Криштианудан кешірім сұрамайтынын мәлімдеді.
Португалия футбол федерациясы ресми түрде жаттықтырушы қолдады: Криштиануға айыппұл салынып, ойыннан шеттетілді, дегенмен бұл дисквалификация Ұлттар лигасының келесі матчтеріне дейін аяқталуы тиіс еді. Ақыры Роналду ресми қоштасу матчін де өткізбестен, карьерасын аяқтайтынын хабарлады.
"Бәлкім, уақыты келген шығар. Ол да бұл мәселеге келу керек екенін іштей сезіп, түсінген болар. Әрине, бұлай болмағанын қалар едік. Жаттықтырушымен болған бұл жағдай оған да, жалпы Португалия федерациясына да абырой әпермейді. Меніңше, олар бәрін басқаша жасауы керек еді.
Криштиану сияқты футболшыға құрмет көрсетіп, оның ұлттық құрамадағы карьерасын әдемі аяқтауына жағдай жасау керек еді. Бұл - менің жеке пікірім. Көпшілік оны паңдығы үшін айыптап жатады, бірақ меніңше, ол бұған лайықты, өйткені әлемдік және португал футболы үшін орасан зор еңбек сіңірді", - деді біздің тілшімізге берген сұхбатында Қайрат Нұрдәулетов.
Криштиану Роналду Португалия құрамасындағы мансабын ресми түрде аяқтады