Рыбакина - Соболенко: US Open финалын қашан және қайдан көруге болады?

Арина Соболенко және Елена Рыбакина. Фото: depositphotos.com

12 қыркүйектен 13 қыркүйекке қараған түні Қазақстанның үздік теннисшісі, әлемнің бірінші ракеткасы Елена Рыбакина US Open финалында Арина Соболенкомен кездеседі. Бұл теннисшілер арасындағы 18-кездесу болмақ, - деп хабарлайды Tengri Sport.

Әзірге жеке кездесулер есебінде Беларусь өкілі алда - 10:7.

Бұл матч Еленаның WTA live-рейтингінде Соболенкодан жоғары тұрған тұста өтетін алғашқы кездесу болмақ.

Финал нәтижесіне қарамастан, Рыбакина турнир қорытындысы бойынша әлемдік рейтингтің бірінші орнын сақтап қалады.

Матч қашан және қайдан көрсетіледі?

Елена Рыбакина мен Арина Соболенко арасындағы финал 12 қыркүйектен 13 қыркүйекке қараған түні өтеді.

Кездесу Қазақстан уақытымен сағат 01:00-де басталады.

Қазақстандық телеарналар US Open додасын тікелей эфирде көрсетпейді. Алайда матчті Eurosport арнасынан көруге болады.

Instagram-дағы бұл жарияланымды көру

WTA (@wta) жарияланымы

Рыбакина жетістігін одан әрі еселей алады

Еске салайық, қазақстандық теннисші турнирдің жартылай финалына шыққаннан кейін мансабында алғаш рет әлемнің бірінші ракеткасы атанды. Ол WTA live-рейтингінде Арина Соболенкодан озды.

US Open бұған дейін Рыбакинаға бағынған емес. Ол осы турнирде ширек финалға да жетіп көрмеген.

Еленаның еншісінде қазір "Үлкен дулыға" санатындағы екі атақ бар - Уимблдон мен Australian Open. Биыл Мельбурнда өткен турнирдің финалында ол дәл осы Арина Соболенконы жеңген еді.

АҚШ-тағы жеңіс Рыбакинаның WTA әлемдік рейтингіндегі көшбасшылығын одан әрі нығайтып, қоржынына тағы бір ірі жүлде қосуға мүмкіндік береді.