Шайдоровтан жеңілген Илья Малинин спорттан үзіліс алғысы келетінін айтты

Фото: ҰОК баспасөз қызметі/ Сали Сабиров

Мәнерлеп сырғанаудан үш дүркін әлем чемпионы және Олимпиада чемпионы Илья Малинин спорттық мансабында үзіліс алуы мүмкін деп хабарлайды Tengri Sport Халықаралық Олимпиада комитетіне сілтеме жасап.

Мәнерлеп сырғанаудан үш дүркін әлем чемпионы және Олимпиада чемпионы Илья Малинин спорттық мансабында үзіліс алуы мүмкін деп хабарлайды Tengri Sport Халықаралық Олимпиада комитетіне сілтеме жасап.

21 жастағы АҚШ өкілі Олимпиадаға дайындық өзі үшін ауыр сынақ болғанын және енді спорттан демалғысы келетінін мәлімдеген.

"Мәнерлеп сырғанаудан сәл тыныққым келеді. Олимпиада ойындарының алдындағы соңғы төрт жыл шынымен де ауыр болды. Сондықтан жарты маусымға ма, әлде басқа ма... шағын үзіліс алсам деймін, бұл менің көңіл-күйім мен жағдайыма байланысты болады", - деп келтіреді ҰОК сайты спортшының сөзін.

Миландағы Олимпиада ойындарының алдында америкалық спортшы ерлер арасындағы жекелей сындардың басты фавориті саналған және қысқа бағдарламадан кейін көш бастап тұрған еді.

Алайда еркін бағдарлама кезінде Малинин қобалжуға бой алдырып, бірнеше рет құлап қалды және көшбасшылық орнын жоғалтты.

Нәтижесінде, бағдарламаның бұл түрі бойынша Олимпиада алтынын қазақстандық Михаил Шайдоров сенсациялық түрде жеңіп алды.

"Бұл өте жағымсыз жағдай болды... бірақ, бәрі де тегіннен-тегін емес деп ойлаймын. Болған жайт мені шынымен де есеңгіретіп тастады", - деді Малинин еркін бағдарлама туралы.

Михаил Шайдоровтың тарихи алтыны

Еске сала кетейік, Италиядағы Олимпиада ойындарында қазақстандық Михаил Шайдоров еліміздің тарихында мәнерлеп сырғанаудан алтын иеленген тұңғыш спортшы атанды.

Бұған дейін ол төрт құрлық турнирінің чемпионы және әлем чемпионатының күміс жүлдегері болған еді.

Тарихи жүлдеге қол жеткізгеннен кейін, қазақстандық спортшы Малининнің өнерін тамашалау кезінде ерекше толқығанын мойындады.

"Илья мұзда өнер көрсетіп жатқанда, іштей түрлі сезімде болдым және оған қолдау сөздерін айтқым келді. Менен кейін шыққандардың бәрі үшін қатты уайымдадым, өйткені олардың осы Олимпиадаға дейін қандай жолдан өткенін білемін. Әрқайсысы үшін жаным ауырды. Уайымдадым, қолдау көрсеттім, қол соқтым, оларға барынша сенімділік ұялатуға тырыстым", - деді Михаил.

Ал Малининге келер болсақ, ол алтыннан айырылып қалса да, қазақстандық чемпионды құшақтап құттықтады. Осы әрекеті үшін ол арнайы "Әділ ойын үшін" (Fair Play) сыйлығын алды.