Шымкентте еліміздегі ең үлкен стадион салу жоспарланған, бастапқыда оның сыйымдылығы 35 мың адамға есептелген болатын. Айта кетерлігі, нысанның іргетасы бұрынғы сыйымдылық көрсеткішіне сәйкес қаланған еді.
Алғашқы қазығы 2024 жылы қағылғанына қарамастан, жобаның құны әзірге белгісіз.
"Нысан құрылысының түпкілікті құны мемлекеттік сараптаманың оң қорытындысын алғаннан кейін анықталады. Стадион сыйымдылығын 35 мыңнан 60 мың орынға дейін ұлғайтуға байланысты жоба қазір түзету сатысында", – деп хабарлады Шымкент қаласының әкімдігі біздің сауалымызға берген жауабында.
- Жаңа аренаның құрылысын қашан аяқтау жоспарланып отыр?
- Жобаны іске асырудың нормативтік мерзімі, оның ішінде құрылыстың айлармен есептелген ұзақтығы жобалау құжаттамасын әзірлеу аяқталып, мемлекеттік сараптаманың тиісті қорытындысы алынғаннан кейін белгілі болады. Қазіргі уақытта жобалау-сметалық құжаттама әзірленіп жатыр. Құжаттарды мемлекеттік сараптамаға жолдау 2027 жылдың IV тоқсанына жоспарланған, - деп мәлімдеді әкімдік өкілдері.
"Жоқ арена": рекорд стадион құрылысының хронологиясы
Еске салсақ, 2024 жылғы маусым соңында Шымкент әкімі Ғабит Сыздықбеков жаңа стадионның іргетасын қалау рәсіміне қатысты.
2025 жылы Tengrinews тілшілері Қаратау ауданындағы Тұран-2 шағынауданында салынатын стадионның орны туралы "Жоқ арена" деген айдармен материал жариялаған болатын. Ол кезде тек қоршау мен бос жатқан жер болған еді.
Фото: ©️ Tengrinews.kz / Роман Павлов
Ал 2026 жылдың мамырында құрылыс алаңынан болашақ стадионның нобайы көріне бастады. Біздің тілшілеріміз нысанның іргетасы мен тіреуіштерін көрді, ал әкімдік ол кезде стадион 35 мың адамға шақталғанын айтты.
Фото: ©️ Tengrinews.kz / Әлімжан Аманжол
Кейінірек әлеуметтік желілерде аренаның сыйымдылығы артуы мүмкін деген ақпарат тарады. 2026 жылдың шілдесінде әкімдік мұндай жоспардың бар екенін, бірақ бұл нысанның құны мен қауіпсіздігіне әсер етпейтінін айтты.
"Нысанның қымбаттауын болдырмау үшін орындар санын көбейту жұмыстарын конструкциялық және жоспарлау шешімдерін түзету есебінен жүргізу жоспарланып отыр. Барлық ықтимал өзгеріс қажетті техникалық есептеулер жүргізілгеннен кейін, орнатылған тіреуіштер ескеріліп, ҚазҚСҒЗИ-дан арнайы техникалық шарттар алынған соң, мемлекеттік сараптамадан өткен соң және Қазақстан Республикасының құрылыс нормалары мен қауіпсіздік ережелерінің талаптарына қатаң сәйкестікте жүзеге асырылады", – деп сендірді сол кезде әкімдіктегілер.
Шымкенттегі стадион Қазақстандағы ең үлкен аренаға айналуы тиіс
Еске сала кетейік, тәуелсіздік алғаннан бері Қазақстанда үш ірі стадион салынды: "Астана Арена", "Түркістан Арена" және "Қайсар Арена" (Қызылорда).
Дәл қазір елордалық кешен еліміздегі футбол матчтерін өткізуге арналған ең үлкен алаң және ұлттық құраманың негізгі аренасы.
Қазақстанның ең үлкен стадиондары
- "Астана Арена" (30 мың 200 орын);
- Алматыдағы Орталық стадион (23 мың 804 орын);
- Қарағандыдағы "Шахтер" стадионы (19 мың орын);
- Шымкенттегі Қажымұқан атындағы Орталық стадион (18 мың орын).
Сонымен қатар Алматы мен Ақтөбеде де жаңа ареналар салу жоспарланған. Алдын ала мәліметтер бойынша, Алматыдағы стадионның сыйымдылығы шамамен 45 мың, ал Ақтөбедегі арена 35 мың орындық болады.
Осылайша, Шымкенттегі жаңа стадион сыйымдылығы бойынша қазақстандық стадиондар арасында рекордшы атануы мүмкін.
Фото: Шымкент қаласының Ішкі саясат басқармасы
Президент келесі жылды "Ауқымды құрылыс жылы" деп жариялады
Айта кетсек, Қазақстан Президенті Қасым-Жомарт Тоқаев "Жаңа тарихи кезеңдегі Қазақстанның өзекті міндеттері" атты жыл сайынғы Жолдауында 2027 жылды "Жалпыхалықтық ауқымды құрылыс жылы" деп жариялауды ұсынды.
Президент құрылыс жұмыстары облыс орталықтарын, аудандар мен елді мекендерді қамтитынын айтты. Атап айтқанда, жолдар, әуежайлар, вокзалдар, денсаулық сақтау мекемелері, соның ішінде ерекше қажеттіліктері бар балаларға арналған оңалту орталықтарын салу жоспарланған.
Барлық өңірде шығармашылық үйлері, спорт кешендері, кітапханалар мен ғылыми орталықтар бой көтеруі тиіс. Тұрғын үй құрылысы да басым міндеттердің бірі болып қала береді.
Бұдан бөлек, Мемлекет басшысы үкіметке инфрақұрылымды жаңғыртудың ауқымды жоспарын әзірлеуді тапсырды. Оны 2029 жылдың соңына дейін іске асыруға Ұлттық қордан 6,5 триллион теңгеге жуық қаражат бағытталады.