“Шынайы болайық“: “Қайрат“ бапкері Сәтпаев туралы ашық айтты

Фото: instagram.com/burnleyofficial/ © Tengrinews.kz / Маржан Қуандықова

Алматылық "Қайраттың" бас жаттықтырушысы Рафаэль Оразбахтин Дастан Сәтпаевтың "Бернлиге" ауысуына қатысты пікір білдірді, деп хабарлайды Tengri Sport Vesti.kz басылымына сілтеме жасап.

Алматылық клубтың түлегі өткен аптада лондондық "Челсиден" Чемпионшип клубына жалға берілді. Бұрынғы бапкерінің пікірінше, Сәтпаев дұрыс таңдау жасаған.

"Объективті түрде қарасақ, оның Англияда қалғаны жақсы болды. Шынайы болайық, Қазақстан чемпионатынан бірден АПЛ-да ойнап кету, жұмсартып айтқанда, өте қиын. "Челси" шабуыл шебіне үлкен топты жинап алды, оның үстіне Хаби Алонсоның клубқа үлкен амбициямен келгенін ескеру керек. Ол онда жастарды дамыту үшін емес, нақты міндеттерді шешу үшін шақырылды.

Бұл жағдайда Дастан үшін бұл өте жақсы шешім. Чемпионшип – өте қарқынды чемпионат, бәлкім, онда АПЛ-дағыдай жоғары деңгейлі ойыншылар жоқ шығар, бірақ ойын деңгейі мен қарқыны Дастанға пайдалы болады. Сонымен қатар, Дастан "Бернлиде" өз ойын уақытын алатынына сенімдімін", - деді маман Еуропа лигасының матчінен кейін.

Бұдан бөлек, Оразбахтин трансферден кейін Дастанмен сөйлескені туралы айтып берді. Бұл ауысуға "Челси" жаттықтырушысы Хаби Алонсоның өзі талап қойғаны белгілі болды.

"Біздің басшылық Дастанмен сөйлесті, оның айтуынша, оның Англиядан ешқайда кетпеуін дәл осы Алонсо талап еткен. Алонсо оны жақын жерде ұстап, оның ілгерілеуін бақылағысы келеді. Дастанның өзі де, менің түсінуімше, бұл нұсқаға риза. "Бернли" сапында қанша гол соғатыны туралы болжам ба? Егер оншақты гол салса, тіпті тамаша болар еді", - деді ол.

Дастан Сәтпаев Англияда: трансфер тарихы

Еске салсақ, Сәтпаевтың "Челсиге" ауысатыны туралы 2025 жылы белгілі болған еді – ол кезде "Қайрат" өз түлегінің ауысатынын ресми жариялаған. Алайда қазақстандық футболшы кәмелетке толғанға дейін Лондонға бірден аттана алмады.

Instagram-дағы бұл жарияланымды көру

«Қайрат» ФК | FC Kairat Almaty (@f.c.kairat) жарияланымы

Трансфер осы жазда толық жүзеге асты – Дастан "Челсимен" бірге Аустралия мен Азиядағы маусым алдындағы турнеге барып, алаңға шыққаннан кейін 6 минуттан соң-ақ гол соғып үлгерді.

Instagram-дағы бұл жарияланымды көру

Дастан Сәтпаевтың (@d.satpayev) жариялауы

Сәтті дебютке қарамастан, "Челси" басшылығы Сәтпаевты деңгейі төменірек клубқа жалға беру туралы шешім қабылдады. Қазақстандықтың өзі Чемпионшиптегі ойын тәжірибесі оны мықтырақ етеді деп есептейді.