“Тевеске ұқсайды“: жанкүйерлер Сәтпаевтың Лига кубогіндегі алғашқы матчіне тәнті болды

Фото: instagram.com/burnleyofficial/

Қазақстандық Дастан Сәтпаев өнер көрсететін "Бернли" командасы Англия лигасының кубогінде қарапайым "Брэдфордтан" ұтылып, жарыс жолынан шығып қалды, алайда жас вингер жанкүйерлерден оң баға алды, деп хабарлайды Tengri Sport.

Кубоктік ойын 0:0 есебімен аяқталып, пенальти сериясында андердогтар басым түсті.

Дастан Сәтпаев алғаш рет негізгі құрамда шығып, алаңда 80 минут өткізді. Осыдан кейін ол алмастырылып, сәтсіз аяқталған пенальти сериясына қатысқан жоқ.

Алаңда болған уақыт ішінде қазақстандық футболшы екі соққы жасап, 86 пайыз дәл пас берді және сегіз рет допқа таласта жеңіске жетті.

Ағылшын клубының жанкүйерлері оның допқа таласқа белсенді араласқанын атап өтті.

"Бүгінгі кештің жалғыз жағымды тұсы - Сәтпаевтың ширақ көрінуі болды, ал қалған жағдайлар алаңдаушылыққа көптеген себеп тудырды";

"Дастан Сәтпаев - нағыз "питбуль", солай емес пе? Оны Серхио Агуэродан көрі Карлос Тевеске көбірек ұқсатар едім. Нағыз жауынгер", - деп жазады олар әлеуметтік желілерде.

"Брэдфордпен" болған кездесуде бапкер Дастанды оң қанатқа, оның ішінде қорғанысқа жақынырақ қойды. Көптеген жанкүйер оның "туған" позициясында - шабуылдың сол қанатында шыққанын қалайды.

"Ол шабуылшы емес пе? Оң жақ қорғаушы позициясында не істеп жүр?";

"Келесі матчте Сәтпаев Трезордың орнына сол қанатта шығады деп үміттенемін";

"Сәтпаевтың аяқпен жұмысы жақсы. Сонымен қатар алаңда өте белсенді қозғалады. Маған ол ұнайды", - деп жазады "Бернли" жанкүйерлері.

Скауттардың бірі Дастан қазірдің өзінде клубтағы өзге әріптестерінен асып түсетінін айтады.

"Жас екеніне қарамастан, оның футболдағы түйсігі командаластарынан әлдеқайда жоғары", - деп жазады ол.

Скриншоттар: X.com

Әлеуметтік желілерде қазақстандықтың осы ойындағы іс-қимылдарынан жинақ та жасалды.

Dastan Satpayev vs Bradford City pic.twitter.com/eSmf6oj6zM
— Jb (@simplyjb22) 26 тамыз, 2026 жыл

Сәтпаев әзірге "Бернлиде" гол соққан жоқ

Еске сала кетейік, Қазақстаннан барған 18 жасар вингер "Бернлиге" "Челсиден" жалдау шартымен ауысқан болатын. Ол чемпионаттың бірінші турын өткізіп алса, екіншісінде 57-минутта алаңға шықты, бірақ нәтижелі іс-әрекетімен көзге түсіп үлгермеді.

Лига кубогінің матчі Дастан үшін жаңа команданың негізгі құрамындағы алғашқы ойыны болды.