Уимблдондағы қазақстандық дербиде бірінші ракетка жеңіске жетті

Жұптық сындағы Қазақстанның бірінші ракеткасы Анна Данилина сербиялық Александра Круничпен бірге Уимблдонның бірінші айналымындағы тартысты матчте қазақстандық Юлия Путинцева мен канадалық Лейла Фернандесті жеңді, деп хабарлайды Tengri Sport.

Матч үш сетке созылды. Оның алғашқы және екінші партиялары ірі есеппен аяқталды: бірінші сетте Данилина мен Крунич 6:2 есебімен басым түссе, екінші сетте Путинцева мен Фернандес 6:1 есебімен жеңіске жетті.

Шешуші сетте тәжірибелі Крунич/Данилина жұбы жеңіске жетіп, 6:2, 1:6, 6:3 есебімен турнирдің екінші айналымына өтті.

Айта кетейік, бұл жеңіліс Юлия Путинцева үшін қатарынан екінші сәтсіздік болды. Бұған дейін ол Уимблдонның жекелей сынындағы бірінші айналымда германиялық Татьяна Марияға есе жіберген еді.

Уимблдон – 2026-дағы қазақстандықтар

Қазақстанның ерлер және әйелдер арасындағы жекелей сында, сондай-ақ ерлер және әйелдер жұптық сында және аралас жұптар сайысында әлі де өкілдері бар. Бүгін Лондонда өтіп жатқан "Үлкен дулыға" турниріндегі жарыс жолын Елена Рыбакина мен Александр Бублик жалғастырады, ал ертең Андрей Голубев/Александр Недовесов жұбы алғашқы матчін өткізеді.

Анна Данилинаның әйелдер жұптық және аралас жұптар сайысындағы келесі матчінің кестесі кейінірек жарияланады.

Айта кетейік, Елена Рыбакина Уимблдонда жеңіске жетсе, ол әлемнің бірінші ракеткасы атанады.