Ұлттық құрамада болған Қазақстан чемпионы Шымкентте қаза тапты

Фото: instagram.com/azamat_kz_17/

Грек-рим күресінен сурдо спортшылар арасындағы Қазақстанның бұрынғы чемпионы Әділ Тілектес Шымкенттегі зауыттардың бірінде қаза тапты. Ол 2024 жылға дейін ұлттық құрама сапында болған, - деп хабарлайды Tengri Sport.

Есту қабілеті бұзылған спортшының қазасы туралы ақпарат әлеуметтік желілерде тарады. Шымкент Полиция департаменті біздің сауалымызға жауап бере отырып, қайғылы оқиғаның зауыттардың бірінде болғанын растады.

"Қала аумағындағы кәсіпорындардың бірінде жұмысшының қаза болуы дерегі бойынша полиция соталды тергеу амалдарын жүргізіп жатыр. Алдын ала мәлімет бойынша, ер адам жұмыс істеу кезінде тоқ соғып қаза тапқан. Қазіргі уақытта оқиғаның мән-жайын анықтауға бағытталған қажетті тергеу әрекеттері жүргізіліп жатыр", - деп мәлімдеді Шымкент ПД.

Сурдлимпиада комитетінің баспасөз қызметі 28 жастағы Әділ Тілектестің грек-рим күресінен ел чемпионы болғанын, ұлттық құрама сапында өнер көрсетіп, әлем чемпионатының жүлдесіне бір қадам қалғанын растады.

"Әділ Тілектес 2021 жылдан бастап есту қабілеті бұзылған спортшылар арасындағы грек-рим және еркін күрестен Қазақстан Республикасы ұлттық құрамасының мүшесі болған. Еркін күрестен "Қазақстан Республикасының еңбек сіңірген спорт шебері" атағы бар.

Спорттық мансабында Ә.Б. Тілектес келесідей нәтижелерге қол жеткізген:
•⁠ ⁠2021 жылғы сурдо еркін күрестен Қазақстан Республикасының чемпионы;
•⁠ ⁠2021 жылғы сурдо еркін күрестен әлем чемпионатында 4-орын;
•⁠ ⁠2022 жылғы Қазақстан Республикасының ІІІ Сурдлимпиадалық спартакиадасында еркін күрестен 2-орын;
•⁠ ⁠2026 жылғы сурдо еркін және грек-рим күресінен Қазақстан Республикасының IV Спартакиадасына қатысушы", - деп хабарлады тілшімізге.

Дегенмен, кейінгі екі жылда ол ұлттық құрама сапына өте алмаған. Соңғы өткен Спартакиадада да жүлдесіз қалды.

Әлеуметтік желілерде Әділдің қазасы туралы хабарға оның достары мен өзін жары ретінде таныстырған адамдар пікір білдірді.

"Сенер емеспін... Бұл менің ең жақын досым еді! Әділдің енді арамызда жоқ екенін сезіну өте ауыр. Қатты қайғырып отырмын. Ол менің жадымда және жүрегімде мәңгі сақталады", - деп жазды Азамат Исабек.

"Сүйікті жарым! Жүрегі кең адам едің!" - деп жазды қолданушылардың бірі.

Қаза тапқан 28 жастағы спортшының артында екі баласы қалды.