Әлем чемпионатындағы Нидерланды - Жапония матчі төрт голмен аяқталды

14 маусымнан 15-іне қараған түні Нидерланды құрамасы 2026 жылғы әлем чемпионатының F тобындағы бірінші тур матчында Жапония командасымен тең түсті, деп хабарлайды Tengri Sport.

Командалар арасындағы кездесу "Эй-ти-энд-ти Стэдиум" стадионында (Техас, АҚШ) өтті. Естеріңізге сала кетейік, 2022 жылы өткен бұрынғы мундиальда нидерландылықтар ширек финалға дейін жетіп, болашақ чемпиондар – Аргентина құрамасына жол берген болатын.

Өз кезегінде Жапония Қатардағы әлем чемпионатында өнер көрсетуін 1/8 финалда аяқтады, онда пенальти сериясы бойынша болашақ қола жүлдегерлер – Хорватия құрамасынан жеңілді.

Командалар құрамы

Нидерланды: Вербрюгген (Қ), Дюмфрис, Ван Хекке, Ван Дейк, Ван де Вен, Де Йонг, Гравенберх, Рейндерс, Саммервилл, Гакпо, Мален.

Жапония: Сузуки, Ватанабэ, Танигути, Ито, Доан, Сано, Камада, Накамура, Кубо, Маэда, Уэда.

Матч барысы

Бірінші таймда Нидерланды құрамасы допқа көбірек иелік етті – жапондардың 31 пайызына қарсы 69 пайыз, алайда бұл басымдық соғылған голға ұласпады.

Екінші таймның 51-минутында нидерландылықтар есеп ашты: команда капитаны Вирджил Ван Дейк қапталдан асырылған допты басымен қақпаға бағыттады.

Алайда арада 6 минут өткенде жапондар есепті теңестірді, Кейто Накамура Нидерланды құрамасының қорғаушысының тасасынан қақпаның жақын бұрышын дәл көздеді.

64-минутта "қызғылт сарылар" екінші голын соқты: жартылай қорғаушы Крисенсио Саммервилл допты қапталдан алып, ортаға қарай ойысты да, оны жапондар қақпасының алыс төменгі бұрышына бағыттады.

Кездесу соңында, 89-минутта, жапондар есепті тағы да теңестірді. Бұрыштамадан асырылған доптан кейін Коки Огава қақпаға басымен соққы жасады, доп Даичи Камадаға тиіп барып қақпаға түсті.

Матчтің қорытынды есебі - 2:2.

Мундиальдың келесі матчтары Кот-д’Ивуар мен Эквадор, сондай-ақ Швеция мен Тунис арасында 15 маусым күні таңертең Қазақстан уақытымен сәйкесінше 04:00-де және 07:00-де өтеді. Матчтардың трансляциясын қайдан және қашан көруге болатынын осы жерден біле аласыз.