Англия көшбасшысы Ганамен матчте сәтсіз ойын көрсетті: оны бақсы қарғады ма?

Футболдан әлем чемпионатының топтық кезеңі аясында Англия құрамасы Гана командасын жеңе алмай, сенсация жасады. Ойынға бірнеше күн қалғанда БАҚ-та африкалық бақсының мәлімдемесі тараған болатын: ол команда капитаны Харри Кейнді қарғап-сілейтінін айтқан еді, деп хабарлайды Tengri Sport.

Әлем чемпионатының топтық кезеңінің екінші турындағы Англия - Гана матчі 0:0 есебімен аяқталды. Бұл ретте ағылшындарда көптеген мүмкіндік болды: олар 19 соққы жасап, допқа толықтай иелік етті.

Гол соғудың ең айқын мүмкіндіктерінің бірі матч соңында команда капитаны әрі үздік сұрмергені - "Бавария" форварды Харри Кейнде болды.

Ол өзіне тән емес қателік жасап, қақпашы алаңының сызығынан дерлік мүлт кетті.

Бұл эпизод - Кейннің осы матчтегі сәтсіздіктерінің тек бір бөлігі ғана. Статистика бәрін айтып тұр: ол бүкіл ойын бойы допқа тек 19 рет қол тигізіп, үш-ақ соққы жасаған.

WhoScored порталы шабуылшының өнерін 6,4 ұпайға бағалады - негізгі құрамда бұдан төмен көрсеткіш тек Беллингем (6,1) мен Мадуэкеде (6,3) ғана.

Фото: whoscored.com

Кейн сәтсіз ойнады, бірақ бұған сиқырдың қандай қатысы бар?

Кейннің дәл Ганаға қарсы ойында жолы болмайтынын африкалық бақсы Нана Кваку Бонсам ескерткен болатын.

Матчке бірнеше күн қалғанда ол өзінің туған командасына қарсы ойын алдында Англия құрамасының жұлдызына арнайы қарғыс айтқысы келетінін мәлімдеді.

"Мен Харри Кейнмен жұмыс істеп жатырмын. Бұған дейін не істей алатынымды көрсеткенмін, сондықтан оны тоқтату үшін не істеу керек екенін білемін. Мен өз болжамдарыммен танымалмын. Мен оның ауыр жарақат алғанын қаламаймын. Оны өз еліме қарсы матчте тоқтату үшін осының өзі жеткілікті болады. Мен Ганаға көмектесу үшін өз жұмысымды істеймін", - деді ол.

Матчтен кейін бақсы Гананың ағылшындармен ойында ұпай еншілеуіне кім себепкер болғанын әлемнің есіне салуды ұмытқан жоқ.

"Рухани жұмысқа келгенде - мен әлемдегі ең құдіретті спиритуалистпін. Мен оны байлап тастаған едім, ал енді оны босатамын, сонда ол келесі матчінде гол соға алады", - деп түсіндірді Кваку Бонсам өзінің YouTube-арнасында.

Видеода ол Харри Кейннің фотосуретімен арнайы ритуал өткізіп, ойыншыға деген бақылауын символикалық түрде тоқтатады.

Кейннің және Гана құрамасының келесі матчі

Айта кетейік, өзара тең түскеннен кейін L тобында африкалықтар мен ағылшындардың еншісінде 4 ұпайдан бар және олар алғашқы екі орынды иеленіп тұр. Плей-офф кезеңіне әр топтан үздік нәтиже көрсеткен сегіз үшінші орын иегері шығатынын ескерсек, соңғы ойындардағы жеңілістің өзі қос команданың 1/16 финалда ойнауына кедергі болмайды.