Франция құрамасы Әлем чемпионатының топтағы шешуші матчінде бапкерсіз қалды

Фото: thenews2.com/depositphotos.com

Франция құрамасының бас бапкері Дидье Дешам футболдан әлем чемпионатының I тобында көшбасшы анықталатын Норвегияға қарсы матчке қатыса алмайды, деп хабарлайды Tengri Sport Франция футбол федерациясының баспасөз қызметіне сілтеме жасап.

Француздарды 2018 жылы әлем чемпионы атағына жеткізіп, өткен мундиальда финалға алып шыққан тәлімгер анасының қайтыс болуына байланысты шұғыл түрде үйіне аттанды.

"Дидье Дешам Норвегия - Франция матчі алдындағы жаттығуларды өткізе алмайды. Сондай-ақ ол жұма күні I тобындағы соңғы ойын кезінде қосалқы құрам орындығында болмайды. Сейсенбі күні таңертең ұлттық құрама бапкері анасының дүниеден өткені туралы қаралы хабарды естіді. Ол жерлеу рәсіміне қатысу үшін Францияға оралады.

АҚШ-тағы әлем чемпионатында Франция құрамасының жаттығу лагерінде жүрген Франция футбол федерациясының президентімен келісе отырып, Дидье Дешам өзі оралғанға дейін команданы басқаруды көмекшісі Ги Стефанға тапсырды", - делінген федерация мәлімдемесінде.

Айта кетейік, топтық кезеңнің соңғы матчінде француздар Норвегия құрамасына қарсы ойнайды.

Бірінші орынды сақтап қалу үшін оларға жеңілмеу жеткілікті, бірақ жеңілген жағдайда екінші орынға түседі, бұл плей-офф кестесіне айтарлықтай әсер етеді.

Алғашқы екі матчте Дешам командасы Сенегал (3:1) мен Ирак (3:0) құрамаларын айқын басымдықпен жеңді.

Didier Deschamps ne pourra pas assurer les entraînements avant la rencontre Norvège-France. Il ne pourra pas non plus être présent sur le banc vendredi pour le dernier match des Bleus dans le groupe I (21 heures, h.f.).

Le sélectionneur national a eu la douleur, ce mardi matin,… pic.twitter.com/Mqi67B0tJF
— FFF (@FFF) June 23, 2026