Хамзат Чимаев сенсациялық жеңілістен кейін үн қатты

Орта салмақтағы UFC-дің бұрынғы чемпионы Хамзат Чимаев белбеудің жаңа иегері Шон Стриклендке қарымта кездесу өткізуді ұсынды, деп хабарлайды Tengri Sport.

Орта салмақтағы UFC-дің экс-чемпионы Хамзат Чимаев өзінің әлеуметтік желілердегі парақшаларында белбеуін тартып алған Шон Стриклендке үндеу жасады.

Борз оған дайын болған кезде хабарлас деп, файтерлер арасында жуық арада қарымта жекпе-жек болатынын меңзеді.

"Дайын болғанда маған хабар бер", - деп жазды Чимаев.

Алайда бұл мәлімдеме UFC президенті Дана Уайттың жекпе-жектен кейінгі баспасөз мәслихатында айтқан сөздеріне қайшы келеді.

Промоушен басшысының айтуынша, Хамзат Чимаев салмақ дәрежесін ауыстырып, жартылай ауыр салмаққа өтуді көздеп отыр және бұдан былай орта салмақта жұдырықтасуды жоспарламайды.

Еске сала кетейік, орта салмақтағы чемпиондық атақ үшін жекпе-жек 10 мамырда Ньюарктегі (Нью-Джерси штаты, АҚШ) аренада өткен UFC 328 турнирінде болды. Жекпе-жек толық 5 раундтқа созылып, төрешілер шешімімен аяқталды.

Бірінші кезеңде Чимаев тез арада тейкдаун жасап, бүкіл бес минут бойы Стриклендті бақылауда ұстады. Алайда келесі раундтарда Борз көпшілік күткеніне қарамастан, күреске бармай, америкалықпен тік тұрып айқасты.

Бұл тіпті Стриклендтің өзін де таңғалдырды, ол жекпе-жек бойы аяққа өту мен партерге түсіруді күтіп, жекелеген соққылар бағыттап, қашықтықты сақтады. Бірақ көрермендер Чимаевтан партерде басымдықты көре алмады, ал Стрикленд тік тұрған қалыпта соққыларды жаудырып, эпизодтарды өз пайдасына шешті. Нәтижесінде төрешілер жеңісті оған берді.

Файтерлер арасында жанжал өршіп кеткеніне қарамастан, соңында олар жылы лебіз білдіріп, тіпті Чимаев UFC-дің жаңа чемпионына белбеуді өз қолымен тақты. Сондай-ақ жекпе-жектен кейін Стрикленд өз мәлімдемелері үшін АҚШ пен Ресейдің жекпе-жек жанкүйерлерінен кешірім сұрады. Ол мұның бәрі тек "жекпе-жекті жарнамалау" үшін айтылғанын мәлімдеді.

Хамзат Чимаев мансабында алғаш рет жеңілді