Канада Иран футбол федерациясының басшысын ФИФА конгресіне жібермеді

Канаданың иммиграциялық билігі Иран футбол федерациясының басшысы Мехди Таджды елге кіргізбеді, - деп хабарлайды Tengri Sport тілшісі Tasnim мәліметіне сілтеме жасап.

Дереккөз мәліметінше, Иран делегациясы Канадаға жарамды визалары және уақытша тұруға рұқсат қағаздарымен барған.

Алайда шекаралық бақылаудан өткеннен кейін билік оны және Иранның өзге де спорт шенеуніктерін жақын арадағы рейспен кері қайтарған.

Иран тарапы Канада иммиграциялық офицерлерінің бұл әрекетін "орынсыз қылық" және "қорлық" деп сипаттады.

Дегенмен кейбір дереккөздер бұл шешімді Мехди Тадждың өткенімен байланыстырады.

Iran International ақпаратына сәйкес, ол бұған дейін Ислам революциясының сақшылар корпусында (ИРСК) басшылық лауазымдарда болған. Канада бұл ұйымды 2024 жылдан бастап ресми түрде террористік ұйымдар тізіміне енгізген.

ФИФА-ның Иран бойынша ұстанымы

Еске салайық, ФИФА президенті Джанни Инфантино Таяу Шығыстағы жағдайға қарамастан, Иран құрамасы әлемдік додаға қатысуы тиіс деп мәлімдеген болатын.

Халықаралық футбол федерациясы басшысының айтуынша, ирандық футболшылар турнирде өнер көрсетуге дайын.

"Иран командасы келеді, бұл анық. Ешқандай өзгеріс болмайды. Ол уақытқа дейін жағдай тұрақталады деп үміттенеміз. Бұған дейін айтқанымдай, бұл көмектесуі мүмкін. Бірақ ирандықтар келуі керек. Олар өз халқының атынан шығады. Олар іріктеуден өтті. Ойыншылар ойнағысы келеді. Мен оларға екі апта бұрын Антальядағы оқу-жаттығу жиынына бардым. Олар шынымен ойнауды қалайды. Және олар ойнауы тиіс - олар саясатпен емес, спортпен шұғылдануы керек", - деді Инфантино Invest in America форумында.

Бұған дейін АҚШ президенті Дональд Трамп Халықаралық футбол федерациясынан (ФИФА) Иран құрамасын Италия командасымен алмастыруды сұраған болатын.