Мбаппе “диктатор“ туралы жаңа мемдер толқынын тудырды

Әлеуметтік желілерде Франция құрамасының жұлдызы Килиан Мбаппенің Иракқа қарсы матч үзілісінде алаңды тазалауға араласқан видеолары тарап жатыр. Оған су алаңның бір жартысынан ғана тазартылғаны ұнамаған, деп хабарлайды Tengri Sport тілшісі La Parisen-ге сілтеме жасап.

Әлем чемпионаты топтық кезеңіндегі Франция - Ирак матчі бірінші және екінші тайм арасындағы найзағай салдарынан тоқтатылды. Нәтижесінде командалар кездесуді аяқтау үшін 4 сағатқа жуық уақыт жұмсауға мәжбүр болды.

Нөсерден кейін алаңды шұғыл тазалау басталды, бір сәтте Мбаппе қызметкерлерге қосылды. Видеодан футболшы жұмысшыларға бірдеңе айтып жатқанын көруге болады.

"Бұл ашулану емес еді. Алаңның біз шабуылдайтын жағы суға толып кетті. Олар біз қорғанған жақты 20 минут бойы тазалады, бірақ біз шабуылдайтын жақпен мүлдем айналысқан жоқ, бұл тең емес жағдай туғызады. Мен олардың алаңның екі бөлігіне бірдей уақыт бөлгенін қаладым. Таңдау керек болса, біз шабуылдайтын жақты тазалаған дұрыс еді", - деді Килиан матчтан соң.

Айта кетейік, ойын 3:0 есебімен аяқталып, Килиан Мбаппе дубль жасады. Осылайша ол Әлем чемпионаты тарихындағы үздік сұрмергендер тізімінде аргентиналық Лионель Мессиге жақындады.

Мбаппе - диктатор: болған жайтқа әлеуметтік желідегі реакция

Түсіндіргеніне қарамастан, әлеуметтік желілерде бұл жағдайдан кейін Килиан туралы мемдер көбейіп кетті. Жанкүйерлердің пікірінше, видео Мбаппенің бұйрық бергенді жақсы көретінін тағы бір мәрте дәлелдеді, сондықтан оның "Диктатор" деген лақап аты бұрынғыдан да өзекті бола түсті.

"Ол алақанын бағбанның иығына қалай қойғанын көрдіңіздер ме - бұл үстемдік пен менсінбеушілікті білдіреді";

"Ол ойын алаңын ретке келтіруге көмектескісі келгені анық, бірақ "диктатор Мбаппе" туралы мемдер мені күлкіге қарық қылды";

"Оның істеп жатқаны өте тамаша", - деп жазады жанкүйерлер.

Еске сала кетейік, диктатор Мбаппе туралы мемдер мадридтік "Реал" жанкүйерлері тобы "Мбаппе - диктатор және Мадридтің нөмірі бірінші жауы" деген жазуы бар және клубпен келісімшарттың аяқталуына дейінгі кері санағы бар сайт ашқаннан кейін жаппай тарай бастады.

Фото: әлеуметтік желілерден

Бұған дейін әлеуметтік желілерде Франция - Колумбия жолдастық кездесуінен үзінді тараған болатын, онда ол Шеркиден Кантеден капитандық белгіні алып, өзіне беруін сұраған еді.

Кейін бұл оқиғаға Мбаппенің "Пари Сен-Жермен" мен мадридтік "Реалдан" жаттықтырушыларды жұмыстан шығаруға бастамашы болғаны туралы көптеген қауесет қосылды. Атап айтқанда, Мбаппе клубтың соңғы жаттықтырушысы Альваро Арбелоамен жария түрде жанжалдасып қалған болатын.

Әлем чемпионатында француздардың Сенегалға қарсы алғашқы матчі кезінде де трибунадан Мбаппенің диктатор бейнесіндегі плакаты байқалды.

ӘЧ-26: Франция - Ирак матчі найзағай салдарынан 4 сағатқа жуық уақытқа созылды