ӘЧ-26: Франция - Ирак матчі найзағай салдарынан 4 сағатқа жуық уақытқа созылды

Фото: DURAOFOTO/depositphotos.com

23 маусымға қараған түні 2026 жылғы футболдан әлем чемпионатының I тобындағы екінші тур матчінде Франция құрамасы Ирак командасын жеңді, деп хабарлайды Tengri Sport.

Кездесу "Линкольн Файненшел Филд" стадионында (Пенсильвания, АҚШ) өтті.

Естеріңізге сала кетейік, өткен турда француздар Сенегалды сенімді түрде жеңсе, ал ирактықтар Норвегиядан оңбай ұтылған болатын.

Ойын барысы

Матчтегі есепті 14-минутта Франция құрамасы ашты: шабуылшы Килиан Мбаппе Майкл Олисемен пас алмасып, айып алаңының сыртынан жойқын соққымен Ирак қақпашысын қапы қалдырды.

Instagram-дағы бұл жарияланымды көру

433 (@433) жарияланымы

Екінші таймның басталуы ауа райына байланысты Қазақстан уақытымен шамамен сағат 03:00-ге шегерілді.

Анықтама: Найзағай салдарынан матч бірнеше рет тоқтатылды. ӘЧ-2026-дағы қазіргі қауіпсіздік хаттамасына сәйкес, егер аренадан шамамен 13 шақырым радиуста найзағай тіркелсе, кездесу дереу тоқтатылуы тиіс. Ойын соңғы найзағай жарқылынан кейін кемінде 30 минут өткен соң ғана қайта жалғасуы мүмкін. Егер осы уақыт ішінде жаңа разряд тіркелсе, уақыт санағы қайтадан басталады.

Instagram-дағы бұл жарияланымды көру

433 (@433) жарияланымы

Екінші тайм Қазақстан уақытымен таңғы сағат 05:00 шамасында қайта басталды.

Матчтің 54-минутында Ирак құрамасының қорғанысы пастан қателесті, мұны Килиан Мбаппе сәтті пайдаланып, дубль жасады. Бұл гол француз үшін әлем чемпионаттарындағы 16-шы гол болды.

Осылайша, шабуылшы мундиальдарда соққан голдар саны бойынша аңызға айналған Мирослав Клоземен теңесті. Айта кетейік, 22 маусымнан 23-іне қараған түні Лионель Месси де Австрия қақпасына екі гол соғып, рекорд орнатып, өз рекордын жаңартты. Аргентиналықтың еншісінде әлем біріншіліктерінде соғылған 18 гол бар.

66-минутта Усман Дембеле Майкл Олиседен пас алып, шабуылды дәл соққымен түйіндеп, Франция есебін арттырды.

Instagram-дағы бұл жарияланымды көру

433 (@433) жарияланымы

Матчтің қорытынды есебі - Франция құрамасының пайдасына 3:0.

Айта кетейік, 02:00-де басталған матч жалпы алғанда 3 сағат 48 минутқа созылып, Қазақстан уақытымен 5:48-де аяқталды.

Үшінші турда француздар норвегиялықтармен ойнайды, ал сенегалдықтар ирактықтармен кездеседі. Екі кездесу де 26 маусымнан 27-іне қараған түні Қазақстан уақытымен сағат 00:00-де өтеді.