“Месси үшін қуаныштымын“ - футбол аңызы әлем чемпионаттары рекордының жаңарғаны туралы

Фото: actionsports/depositphotos.com

Германия құрамасы сапында әлем чемпионы атанған және мундиаль тарихында гол салудан бұрынғы рекорд иесі Мирослав Клозе аргентиналық Лионель Месси жаңа жетістік орнатқаннан кейін онымен әңгімелескені туралы айтып берді, деп хабарлайды Tengri Sport Бундеслига баспасөз қызметіне сілтеме жасап.

Неміс футболының аңызы 2002-2014 жылдар аралығында өткен әлем чемпионаттарында 16 гол соққан. Клозе өзінің соңғы добын немістер жеңіске жеткен 2014 жылғы әлем біріншілігінде Бразилия құрамасы қақпасына (7:1) енгізді.

Бұл рекорд 12 жыл бойы бұзылмай келді – тек АҚШ, Мексика және Канадада өтіп жатқан биылғы мундиальда аргентиналық Лионель Месси неміс шабуылшысының жетістігінен асып түсті. Қазір оның еншісінде 21 гол бар.

Клозенің айтуынша, Месси оның рекордын жаңартқан соң, олар телефон арқылы сөйлескен және Месси оған өз жейдесін жіберуге уәде берген.

"Месси екеуміз, әрине, алаңда бірнеше рет кездестік және бұл әрдайым керемет әрі өзара құрмет жағдайында өтетін. Бірақ бұл қоңырау алаңнан тыс жерде осыншама ұзақ сөйлескен алғашқы сәтіміз болды. Ол маған қолтаңбасы қойылған жейдесін жіберетінін айтты. Бәрі жақсы. Рекорд бәрібір ерте ме, кеш пе жаңартылатын еді, сондықтан мұны Месси жасағанына қуаныштымын. Мен әрқашан Мессидің жанкүйері болғанмын және солай болып қала беремін", - деді ол Бундеслига баспасөз қызметіне.

Мирослав Клозе - әлем чемпионы

Еске сала кетейік, Клозе мансабында "Кайзерслаутерн", "Вердер", "Бавария" және "Лацио" клубтарында ойнап үлгерді. Оған Чемпиондар лигасын жеңу бұйырмағанымен, Германия құрамасымен бірге Әлем чемпионаты финалына екі рет шығып, 2014 жылы мундиаль жеңімпазы атанды.

Атақты форвард өз мансабында 300-ден астам гол соқты және Германия құрамасы тарихындағы үздік сұрмерген болып отыр.

Instagram-дағы бұл жарияланымды көру

German Football (@germanfootball_dfb) жарияланымы

Ал Лионель Мессиге келетін болсақ, аргентиналық шабуылшы Әлем чемпионаты топтық кезеңінде Австрия құрамасына қарсы ойында дубль жасап, Клозенің рекордын жаңартты.

Қазіргі уақытта Аргентина құрамасының капитаны командасын финалға бастап келеді – олар ширек финалға шығып үлгерді, онда Швейцария құрамасына қарсы ойнайды.

2026 жылғы футболдан Әлем чемпионаты 20 шілдеге дейін жалғасады.

Лионель Месси Гиннес рекордын жаңартты

Суперкомпьютер 1/4 финал қарсаңында футболдан әлем чемпионы қай елдің құрамасы болатынын атады

Криштиану Роналду 2026 жылғы Әлем чемпионатынан шығып қалғаннан кейін мәлімдеме жасады