“Роналдумания“: Криштианудың Канадаға келуі дүрбелең туғызды

Португалия құрамасының жұлдызы Криштиану Роналду әлем чемпионаты кезінде алғаш рет АҚШ аумағынан шықты. Канадаға келген әйгілі шабуылшыны жанкүйерлері ыстық ықыласпен қарсы алды, деп хабарлайды Tengri Sport.

Бүгін 3 шілдеге қараған түні Португалия әлем чемпионатының 1/16 финалында Хорватияға қарсы ойын өткізеді.

Командалар ойын өтетін Торонтоға келді. Бұл ретте әлемдік футбол жұлдызының Канадаға келуі жанкүйерлер арасында дүрбелең туғызған.

"Роналдумания";

"Ол - біздің дәуіріміздің Майкл Джексоны",

"Криштиану Роналду футболдан әлем чемпионатында Португалияға жанкүйерлік ететін канадалықтармен амандасу үшін уақыт тапты. Ол тоқтап, екі жаққа да қол бұлғады. Ол қандай керемете адам!", - деп жазып жатыр желі қолданушылары.

Видеолардың бірінде Роналду командаластарымен бірге қонақүйдің балконына шығып, төменде тұрған адамдармен амандасқанын көруге болады.

Екінші бір видеода да Роналдуды алыстан көрген адамдардың оған қалай ұмтылғаны байқалады.

Желі қолданушылары Криштианудың адамдармен жылы шыраймен амандасқанын ерекше жазып жатыр.

Криштиану Роналду - әлемдегі ең танымал футболшы

41 жастағы Криштиану Роналду кейінгі жылдары мансабын Сауд Арабиясында жалғастырып жатыр. Оның Instagram парақшасына 669 миллион адам жазылған, ал жалпы әлеуметтік желілердегі оқырмандар саны баяғыда-ақ миллиардтан асып кеткен.

Кәсіби мансабында ол ағылшындық "Манчестер Юнайтед", испаниялық "Реал Мадрид", италиялық "Ювентус", сондай-ақ "Спортинг" клубтарында доп тепкен. Оның қоржынында 5 "Алтын доп" бар. Одан бөлек, Чемпиондар лигасының бес дүркін жеңімпазы.

Сонымен қатар Криштиану Роналду - әлем футболында салынған голдар саны бойынша рекордшы. Оның әлем чемпионатындағы Өзбекстан қақпасына соққан қос голы мансабындағы 974 және 975-гол болды.

Португалия мен Хорватия арасында 1/16 финалдық кездесу 3 шілде күні Қазақстан уақыты бойынша сағат 04:00-де басталады.

Бұған дейін Португалия аңызы Криштиану Роналду әлем чемпионатындағы алғашқы матчтен кейін сынға ұшыраған еді. Кейін португалиялық ойыншы хейтерлерге жауап берді.

Әлем чемпионатының 1/8 финалында ойнайтын бес жұп анықталды