Төрешілер “Реалға“ қарсы: клуб жанжалдан кейін лига басшылығын ауыстыруды талап етті

Фото: canno73/depositphotos.com; Видео кадрлары

Мадридтік "Реал" Ла Лига президенті Хавьер Тебас Медраноның клубқа қарсы мәлімдемелерге пікірінен кейін оның отставкаға кетуін талап етті, - деп хабарлайды Tengri Sport.

Испанияда мадридтік дербидегі төрелікке қатысты жанжал жалғасып жатыр. "Реал" өкілдері төрешілер командаға қарсы әдейі шешім қабылдады деп есептейді, ал лига президенті тәуелсіз медиадағы бұл туралы мақаланы сынға алды.

"Оның соңғы мәлімдемелері өте өрескел әрі түсініксіз, жауапты менеджерге лайық емес, өйткені олар цифрлық БАҚ-тағы тәуелсіз журналистің мақаласына жауап ретінде айтылған. Соған қарамастан, ол біздің клубқа қарсы шығып, тіпті спорттық стратегиямызға қатысты пікір білдіруге дейін барады, бұл мүлдем орынсыз әрі жауапсыздық", - делінген "Реалдың" мәлімдемесінде.

Мәлімдеме соңында "Реал" испан футболына жаңа көшбасшы іздеуге шақырып, осылайша Тебастың қызметінен кетуі керек екенін аңғартты.

Бұған жауап ретінде Ла Лига президенті мадридтік клуб бейтараптық пен тәуелсіздікті шатастырып алғанын мәлімдеді.

"Олар менен жарыстың әділдігіне деген сенімді нығайтуға ықпал етуімді талап етеді. Дәл сондықтан мен төрешілер "Реалға" қарсы деген тұжырымды жоққа шығарамын.

Төрешілердің шешімін сынау - заңды құбылыс. Ал әрбір олқылықты қудалаудың дәлеліне айналдыру - мүлдем басқа нәрсе. Бұл сенімді нығайта ма, әлде испан футболының беделіне нұқсан келтіре ме? Олар бейтараптық пен тәуелсіздікті шатастырып отыр", - деп жазды Тебас әлеуметтік желіде.

Екі қызыл қағаз және төрешіні балағаттау: мадридтік дербидегі жанжал

Еске салайық, мадридтік клубтың бас жаттықтырушысы Жозе Моуриньо Испания чемпионатында "Атлетикодан" 1:2 есебімен жеңілгеннен кейін баспасөз мәслихатына ойын сәттерінің скриншоттарымен келген болатын.

Оның айтуынша, бұл суреттерде "Реал" ойыншыларына қарсы жасалған ереже бұзушылықтар дәлелденген, ол үшін төреші қарсыластарды алаңнан қууы тиіс еді.

Mourinho arrived with evidence 🕵️

The Real Madrid boss wasn't happy with some of the decisions made in the Madrid derby 😬 pic.twitter.com/jR3sRG0m9M
- BBC Sport (@BBCSport) September 20, 2026

Матч аяқталғаннан кейін команда көшбасшысы Джуд Беллингем де төрешіге наразылық білдірді. Ол бас төреші Мигель Анхель Ортис Арьясқа дауыс көтеріп, оны балағаттаған.

Айта кетейік, матч барысында төреші тек бір қызыл қағаз көрсетті - соңғы үміт фолы үшін қорғаушы Дин Хёйсенді алаңнан қуды.

🚨Dean Huijsen was sent off for denying Giuliano Simeone a goal scoring opportunity pic.twitter.com/0QCxrVcfaE
- Polymarket Sports (@PolymarketSport) September 20, 2026