Винисиус Роналду мен Мессидің рекордын қайталап, тарихқа енді

Бразилия құрамасы мен мадридтік "Реалдың" жұлдызды вингері Винисиус Жуниор футбол аңыздары - Криштиану Роналду мен Лионель Мессидің жетістігін қайталады, деп хабарлайды Tengri Sport.

Винисиус Жуниор 2026 жылғы Әлем чемпионатының топтық кезеңіндегі барлық үш матчтің үздік ойыншысы болып танылды.

Бразилиялық футболшы тарихта бұл нәтижеге қол жеткізген үшінші ойыншы атанды.

Бұған дейін мұндай көрсеткішке тек Лионель Месси (2014) мен Криштиану Роналду (2010) ғана ие болған еді.

Турнирдің топтық кезеңінде Винисиус үздік статистика көрсетті: 4 гол және 1 нәтижелі пас. Бұл оған отандастары - Роналдо (2002) мен Ривалдоның (1998) рекордын қайталауға мүмкіндік берді. Олар да топтық кезеңнің әр матчінде гол соққан болатын.

Айта кетейік, Бразилия құрамасы топтық кезеңде сенімді ойын көрсетіп, C тобында 7 ұпаймен бірінші орын алды. Команда турнирді Мароккоға қарсы 1:1 есебімен тең ойыннан бастады, сол кезде Винисиус есепті теңестірген болатын. Кейін бразилиялықтар Гаитиді 3:0 есебімен ойсырата жеңсе, шешуші матчта Шотландиядан 3:0 есебімен басым түсті.

Винисиус осы кездесулердің әрқайсысында гол соғып, 1 нәтижелі пас берді.

Еске сала кетейік, Бразилия құрамасы плей-офф кезеңіндегі алғашқы матчін 29 маусымда өткізеді. Олардың қарсыласы Жапония ұлттық құрамасы болмақ.

Бұған дейін футболдан ерлер арасындағы әлем чемпионатының тарихында тұңғыш рет бірден тоғыз африкалық елдің плей-офф кезеңіне өткені белгілі болды.