14 гол және ойыннан қуылған үш ойыншы: Әлем чемпионатындағы кезекті ойын күні қалай өтті?

Футболдан әлем чемпионатының екінші турының басталуы соғылған голдар саны бойынша турнирдегі ең үздік ойын күндерінің біріне айналды. Бірден екі кездесуде төрттен астам гол тіркелді, деп хабарлайды Tengri Sport.

Күннің басты оқиғасы - алаң иелерінің әлем чемпионатының плей-офф кезеңіне мерзімінен бұрын шығуы болды. Мексика құрамасы А тобында көш бастап, 1/16 финалда ойнау мүмкіндігіне ие болды. Дегенмен, басқа матчтерде де қызықты сәттер аз болған жоқ.

Ешкімге тиімсіз болған нәтижелі тең ойын

Алғашқы матчта Чехия мен ОАР құрамалары кездесті. Екі команда да бастапқы ойындарында жеңіліске ұшыраған болатын, сондықтан бұл жолғы жеңіліс оларды топтан тікелей шығу мүмкіндігінен іс жүзінде айыратын еді.

Чехтер ойынның 6-минутында-ақ есеп ашты - Садилек әдемі қарсы шабуылды нәтижелі аяқтады. Гол жіберіп алған соң африкалықтар допқа иелік еткенімен, қауіпті сәттерді көбіне чехтер тудырды.

Бетбұрыс 81-минутта орын алды: ОАР ойыншысы айып алаңына кіріп, қатты соққы бағыттаған кезде доп қорғаушының қолына тиді. Төреші пенальти белгілеп, оны Мокоена мүлтіксіз орындады.

Матч 1:1 есебімен аяқталып, екі команда да шешуші тур алдында плей-офф аймағынан тыс қалды. Енді ОАР Оңтүстік Кореямен бетпе-бет келіп, жолдама үшін таласа алады, ал чехтерге Мексиканы жеңіп қана қоймай, корейлердің сүрінуіне үміт арту керек.

Екі турдан кейінгі А тобындағы командалардың жағдайы:

1. Мексика - 6 ұпай;
2. Оңтүстік Корея - 3 ұпай;
3. Чехия - 1 ұпай;
4. ОАР - 1 ұпай.

Голдар легі және қатарлықтардың дөрекілігі

В тобындағы екі кездесуде барлығы 11 гол соғылды: канадалықтар Қатар қақпасына алты гол, швейцариялықтар босниялықтарға төрт гол салды, ал Босния бір голмен жауап қайтарды.

Канада - Қатар матчының тағдыры бірінші таймның соңына қарай шешіліп қойды. 19-минутта Ларин есеп ашса, 29-шы және 48-минуттарда Дэвид мергендігімен көзге түсті.

Голдар арасында тағы бір оқиға болды - Қатар ойыншысы Ахмед "соңғы үміт" фолын жасады. Төреші алдымен пенальти белгілеп, сары қағаз көрсеткенімен, бейнеқайталауды көргеннен кейін пенальтиді жойып, қағазды қызылға ауыстырды.

Қатарлықтар екінші таймда да ереже бұзуды тоқтатпады. Канада құрамасының жартылай қорғаушысы Исмаэль Коне алаңнан зембілмен шығарылды - Мадибо өте дөрекі ойнап, оның аяғын сындырды және алаңнан қуылды.

Екі ойыншысынан айырылған қатарлықтар тағы үш гол жіберіп алды: 64-минутта Салиба, 75-минутта Аль Маннаидың автоголы және 92-минутта Дэвидтің кезекті голы. Енді ол осы турнирдегі голдар мен хет-триктер саны бойынша Лионель Мессимен теңесті.

Матч 6:0 есебімен Канаданың пайдасына аяқталды.

В тобындағы екінші матчте де алаңнан қуылғандар болды. Босния және Герцеговина бір тайм бойы Швейцарияның шабуылдарынан сәтті қорғанғанымен, екінші таймда Мурат Якиннің командасы қарқынын үдетті.

74-минутта Йоан Манзамби есеп ашты - ол айып алаңының ортасынан допты тоқтатпастан сәтті соққы бағыттай алды.

Ал 80-минутта Мухаремович босниялықтарды азшылықта қалдырды - айып алаңының алдында аяқтан тепкені үшін бірден қызыл қағаз алды.

Азшылықта қалған босниялықтар тез арада тағы екі гол жіберіп алды: 84-минутта Варгас гол соқса, 90-минутта Манзамби дубль жасады.

Махмич қосымша уақытта бір голмен жауап бергенімен, Швейцария ірі есеппен жеңуді көздеді. 97-минутта төреші пенальти белгілеп, оны Джака сенімді түрде орындады.

Матч 4:1 есебімен Швейцарияның пайдасына шешілді.

В тобындағы командалардың жағдайы

Еске сала кетейік, бірінші турда бұл топтағы барлық команда тең ойнаған болатын, сондықтан екінші турдағы ірі жеңістердің өзі әзірге ешкімге топтан шығуға кепілдік берген жоқ.

1. Канада - 4 ұпай (доп айырмасы +6)
2. Швейцария - 4 ұпай (+3)
3. Босния және Герцеговина - 1 ұпай (-3)
4. Катар - 1 ұпай (-6)

Соңғы турда Канада мен Швейцария топ жеңімпазын анықтаса, Катар мен Босния аутсайдердің кім екенін шешеді.

ӘЧ-2026 плей-офф кезеңінің алғашқы қатысушысы анықталды