Арандату ма, әлде масқара ма: Қызылордалық жанкүйерлердің видеосы әлеуметтік желіде пікірталас тудырды

Әлеуметтік желілерде қызылордалық "Қайсардың" ересек жанкүйері "Қайраттың" жас жанкүйерлерінен туды дөрекі түрде тартып алған сәті түсірілген видео жарияланды. Бұл ролик желіде үлкен пікірталас тудырды, деп хабарлайды Tengri Sport.

Бастапқыда "Қайраттың" жанкүйерлер парақшасында жарияланған видео түрлі пабликте ондаған мың қаралым жинап жатыр.

Видеода жас жанкүйер қыздардың "Қайсардың" ересек фанатымен біршама уақыт дауыс көтеріп сөйлесіп тұрғанын көруге болады.

Осыдан кейін ол қыздарға тап беріп, клуб туын тартып алады.

"Кішкентай қыздарға қатысты бұл әрекет айыпталуы керек, полиция қайда қарап отыр?";

"Ұят атаға!";

"Ұят қой, аға", - деп жазды жанкүйерлер видео астында.

Дегенмен, пікір қалдырғандар арасында бұл жағдай әдейі ұйымдастырылған арандату деп есептейтіндер де бар.

"Баяғыда сендер де ақтөбелік қыздардың шарфтарын ұрлағансыңдар. Енді бәрі алдарыңа келді";

"Қыздар өздері арандатып тұр!";

"Бұл Қызылордада тұратын қыздар ғой!" - деп жазды олар.

Екі клубтың да жанкүйерлері қыздарды ренжіткен ер адамның әрекетін айыптады

"Қызылорда жанкүйерлерінен сұрайтынымыз: егер сол жерде сендердің қарындастарың болса, мұны қалай қабылдар едіңдер? Ер адамның қыз балаға қол көтеруі үлкен қателік. Егер бұл футболға қатысты мәселе болса, екі жақтың ультрастары оны өзара шешіп алар еді. Бірақ ешбір тарап қыздарға қол жұмсауды құптамайды!" - делінген "Қайрат" жанкүйерлерінің мәлімдемесінде.

"Қайсар" жанкүйерлері қауымдастығы да ресми мәлімдеме жасады.

"Осындай жағдай болғанына өкініш білдіреміз, бірақ бір адам үшін "Қайсар" клубының барлық жанкүйерін балағаттауды дұрыс емес деп санаймыз. Барлық жанкүйер бірдей емес. Көпке топырақ шашпайық. Түрлі клубқа жанкүйер болсақ та, бәріміз бір тудың астында, бір елде тұратынымызды және ең бастысы, қазақстандық екенімізді ұмытпайық", - деді қызылордалықтар.

"Ол бетіме түкіріп жіберді": қыздар жанжалдың мән-жайын айтып берді

Біздің тілші видео авторларымен байланысты. Олар Қызылорданың кәмелетке толмаған екі тұрғыны болып шықты. 2024 жылдан бері "Қайратқа" жанкүйерлік етіп, матчтан кейін ойыншылармен суретке түскісі келген, бірақ жағымсыз жағдайға тап болған.

"Құрбым туды ұстап тұрған еді, сол кезде әлгі ер адам келіп, оны қолымыздан жұлып алды. Біз аң-таң болып қалдық, ал ол туды жерге тастап, таптай бастады. Мен бұл әрекеттің оғаш екенін түсініп, дереу камераны қостым.

Сосын ол бізге айқайлап: "Қайраттың" туын көтермеңдер, қалай ғана дәтің барып тұр!" - деді. Мен қорыққанымнан басқа жаққа қарай кетіп қалдым. Ол тағы келе ме деп қорқып, туды қалтамызға салып қойдық", - деді жанжалға қатысушылардың бірі Tengri Sport-қа берген сұхбатында.

Қыздың айтуынша, кейін "Қайраттың" бірнеше жанкүйері суретке түсу үшін туды сұраған, сол кезде әлгі ер адам тағы да келіп, оны тартып алмақ болған.

"Ол кезде 4-5 адам болып жиналып тұрғанбыз, ту үшін тартыса бастадық. Ол жұлып алмақ болды, бірақ бірінші ретте қолынан келмеді. Кейін туды жасы үлкенірек басқа бір қыз іліп әкетті, сол кезде әлгі ер адам оның қолынан ұрып жібергендей болды.

Бірақ одан кейін тіпті сорақы жағдай болды - ол менің бетіме, көзімнің жанына түкіріп жіберді. Басында не болғанын түсінбей, жаңбыр жауды ма деп ойладым. Бетімді сүрткенде ғана оның сілекей екенін білдім", - деді қыз.

Ақырында туды жергілікті басқа бір бала тартып алып, белгісіз бағытқа қарай қаша жөнелген.

Ал әлгі ер адамға кейін полицейлер келіп, ол тіпті жанжалға қатысушылардың бірінен кешірім сұраған. Бірақ жас қыздардан емес, жасы үлкенірек қыздан кешірім сұраған екен.

"Ол қыз ер адамды ертіп, полицейлермен бірге кетіп қалды. Кейін білгенім, ол арыз жазбақшы болған екен. Бірақ арыз жазбапты, әлгі кісі кешірім сұрап, мәселе сол жерде жабылған сияқты", - деді ол.

Қыздардың өздері арыз жазбайды, бірақ кешірім сұрағанын қалайды.

"Арыз жазған күннің өзінде, егер бұл үлкен дауға айналып кетсе... Мен оны қаламаймын. Мен тек сол адамның адам ретінде менен және құрбымнан кешірім сұрағанын қалаймын", - деді ол.

Жанкүйерлер агрессиясы қалыпты жағдай ма?

Қыздардың айтуынша, олар "Қайсар" жанкүйерлерінің өздеріне деген агрессиясын матч басталмай жатып-ақ сезінген.

"Біз келе жатқанда "Қайсардың" бір топ жанкүйері қарсы шықты. Олар бізге алая қарап: "Фу, "Қайсар" жеңеді", "Сендер ақымақсыңдар" деп айқайлады. Басында біз бұған мән бермедік, өйткені екі клубтың арасындағы бәсекелестік үйреншікті жағдай. Тіпті матч кезінде де болмашы қақтығыстар болды, бірақ бәрібір солай", - деді қыз.

Tengri Sport тілшісі пікір алу үшін "Қайсар" клубының баспасөз қызметіне хабарласты.

Сауалға жауап ретінде клуб өкілдері бұл жағдайға ешқандай қатысы жоқтығын айтып, пікір білдіруден бас тартты.

Қызылордада Қазақстан чемпионаты аясында өткен "Қайсар" - "Қайрат" матчі 1:2 есебімен алматылық ұжым жеңісімен аяқталғанын атап өтейік. Ойында алаңнан қуу, орындалмаған пенальти және кездесу аяқталуға екі минут қалғанда соғылған жеңіс голы тіркелді.

Бұған дейін жанкүйерлер PGL Astana қарсаңында киберспорт жұлдызын таптап кете жаздағанын жазған едік.