+7 (777) 001 44
99
Бұған дейін Қазақстанның танымал күш иесі, Гиннестің рекордтар кітабының рекордшысы Сергей Цырульниковтың Қазақстан ауыр атлетика федерациясының вице-президенті лауазымына келгені белгілі болған еді.
Tengri Sport тілшісіне берген сұхбатында ол үйреншікті "далалық" жұмысты жаңа міндеттерімен қалай ұштастыратынын және жақын арада алдына қандай мақсаттар қойып отырғанын айтып берді.
Instagram-дағы бұл жарияланымды көру
Цырульниковтың айтуынша, ол ауылдарды аралаудан және жастармен кездесуден бас тартпайды.
"Менің жолым - сөзбен емес, іспен дәлелдеу! Өмір бойы нақты өзгерістер сөз жүзінде емес, іс жүзінде болатынын дәлелдеп келемін. Бұдан былай да ауылдарды аралап, жастармен кездесемін, іс-шаралар өткізіп, күш мәдениетін дамытамын және Қазақстанның атын халықаралық аренада танытамын. Кабинеттегі жұмыс - бұл өз жолымнан бас тарту емес, керісінше, оны тиімдірек ету мүмкіндігі", - деп атап өтті Цырульников.
Instagram-дағы бұл жарияланымды көру
Алғашқы уақытта ол өзекті мәселелерді жете түсіну үшін жаттықтырушылармен, спортшылармен және аймақтық ұйымдармен ашық диалог орнатуды жоспарлап отыр. Оның айтуынша, балалар мен жасөспірімдер ауыр атлетикасын дамытуға, жаттықтырушылар құрамын нығайтуға және жас таланттарды қолдауға ерекше көңіл бөлінеді.
Палуан әлемнің 80-нен астам елінде өнер көрсетуден алған тәжірибесін жастарды спортқа тарту үшін пайдаланбақ.
"Осы тәжірибем мен танымалдығымды ауыр атлетикаға бұдан да көп жастың келуі үшін пайдаланғым келеді. Менің міндетім - ауыр атлетика тек штангі көтеру емес екенін көрсету. Бұл - тәртіп, мінез, ерік-жігер және үлкен жеңістерге апаратын жол. Біз спорттың бұл түрін жастар үшін заманауи, қызықты әрі беделді етуіміз керек", - деді ол.
Цырульников жеке рекордтары мен өнер көрсетулерінен бас тартпақ емес. Оның пікірінше, бұл екеуі бір-бірін толықтыруы тиіс: әрбір халықаралық өнер көрсету - қазақстандық ауыр атлетикаға назар аудартудың және жаңа буынға шабыт берудің қосымша мүмкіндігі.
Ол өзі үшін ең үлкен рекорд ретінде секциялардағы балалар санының артуын және қазақстандық спортшылардың әлемдік тұғырлардағы жетістіктерін санайды.
Instagram-дағы бұл жарияланымды көру
Федерацияның қазіргі жұмысына қатысты жаңа вице-президент бұған дейін атқарылған істерді жоққа шығару үшін келмегенін қадап айтты. Оның мақсаты - атқарылып жатқан жұмыстарды қолдап, оны өзінің тәжірибесімен, беделімен және халықаралық байланыстарымен нығайту.
Сергей Цырульников - ауылдан шыққан қазақстандық рекордшы
Сергей Валерьевич Цырульников - күш рекордтарымен және халықаралық аренадағы өнерлерімен танымал қазақстандық спортшы.
1985 жылы 3 сәуірде Ақмола облысы Шортанды ауданының Новокубанка ауылында дүниеге келген.
Сергей Цырульников - Гиннестің рекордтар кітабының жеті дүркін рекордшысы.
Оның қоржынында күш жаттығулары бойынша бірнеше әлемдік және ұлттық рекордтар бар: тағаны майыстыру, шынжырды үзу, қолмен шеге қағу және басқа да экстремалды нөмірлер. Оның өнері, соның ішінде America’s Got Talent жобасындағы көрсетілімдері кең танымалдылыққа ие болды.
Италияның Милан қаласында өткен Гиннес рекордтар шоуындағы өнер көрсетуінде палуан Гиннес кітабының 3 бірдей рекордын жаңартты: 57 секундта 14 тағаны жазды, өкпе күшімен 9 грелканы жарды және жалаң қолмен табаға 19 шеге қақты.
Tengri Sport тілшісімен әңгімелесу барысында Сергей бірден 10 рекорд орнатуға дайын болғанын, бірақ ұйымдастырушылар оны тоқтатып, болашақта тағы да бірлесіп жұмыс істегісі келетіндерін айтқанын жеткізді.
@sergei_03.04.851985 #цырульниковсергей #цырульник #күш #жақсылық #палуан ♬ түпнұсқа дыбыс - Sergei
