“Барлық мүмкіндігі бар“ - The Ring қазақстандық кәсіпқой боксшының жаңа титулдық жекпе-жегі туралы

Фото © Tengrinews.kz / Тұрар Қазанғапов

Беделді The Ring басылымы қазақстандық Сұлтан Зәуірбектің жартылай жеңіл салмақта IBF титулын жеңіп алуға мүмкіндігі бар деп санайды, деп хабарлайды Tengri Sport басылымға сілтеме жасап.

30 жастағы қазақстандық боксшы аустралиялық Джексон Ингландты төрешілердің шешімімен жеңді.

Бұл жекпе-жектегі жеңіс оған титулға міндетті үміткер мәртебесін қамтамасыз етеді.

"Сұлтан Зәуірбек сенбі күні кешке Аустралияның Квинсленд қаласында Джексон Ингландты жеңгеннен кейін жартылай жеңіл салмақта IBF әлем чемпионы атағы үшін күресуге толық мүмкіндік алды. 114-113, 117-110 және 116-111 есептері қазақстандық солақай боксшыға Эмануэль Наваррете иелік ететін WBO/IBF титулының міндетті үміткері атағын кепілдендірді", - деп жазады The Ring.

Сонымен қатар басылым Зәуірбектің бірден титулдық жекпе-жекке шыға алмайтынын атап өтті.

"Санкциялаушы ұйым аясындағы міндетті титулдық жекпе-жектер кезегінде WBO титулының міндетті үміткері Чарли Суарес (19-0, 11 нокаут) пен WBC уақытша титулының иегері Райан Гарнер (20-0, 10 нокаут) басымдыққа ие болады. Зәуірбекке өз мүмкіндігін қол қусырып күтіп отырғанша, осы уақыт ішінде мықты қарсыластармен жұдырықтасып, белсенділігін сақтағаны абзал", - делінген мақалада.

Айта кетейік, Ингландқа қарсы жекпе-жектің төртінші раундында Сұлтан қарсыласын нокдаунға түсірген болатын, алайда кездесу жалғасып, жеңімпаз төрешілер шешімімен анықталды.

Instagram-дағы бұл жарияланымды көру

QAZAQ KIᑎG (@sultanzaurbek) жариялаған жазба

Қазақстан кәсіпқой бокста

Еске сала кетейік, қазіргі уақытта әлемдік бокста титулдарға бір табан жақын тұрған үш қазақстандық бар. Жәнібек Әлімханұлы – WBO бойынша супер орта салмақтағы міндетті үміткер, Мейірім Нұрсұлтанов – WBC бойынша орта салмақтағы міндетті үміткер, ал енді Сұлтан Зәуірбек – жартылай жеңіл салмақтағы үміткер.

Дегенмен, қазақстандықтардың жаңа жекпе-жектері әлі белгіленген жоқ. Мейірім Нұрсұлтанов америкалық Хесус Рамоспен уақытша белбеу үшін жұдырықтасуы керек еді, бірақ қарсыласы уланып қалғанын алға тартып, айқастан бас тартты.

Instagram-дағы бұл жарияланымды көру

World Boxing Council (@wbcboxing) жарияланымы

Жәнібек Әлімханұлы британиялық Хамза Ширазбен титулдық жекпе-жек өткізуге уағдаласпақ болған, бірақ қарсыласы белбеуден бас тартты, енді қазақстандық боксшы басқа үміткермен келіссөздер жүргізіп жатыр.