+7 (777) 001 44
99
Qazsport арнасының директоры Нағи Бақытбеков Мажарстан - Қазақстан матчі кезінде болған оқиғаға қатысты пікір білдірді, деп хабарлайды Tengri Sport.
Мажарстанның Дебрецен қаласында өткен жолдастық кездесудің 24-минутында алаңға камера құлап кетті. Қуанышқа орай, ешкім зардап шеккен жоқ. Құрылғы алаң жиегінде жұмыс істеп тұрған оператордан небәрі бірнеше метр жерге құлаған.
Осы сәт бейнеленген видео әлеуметтік желілерде тез тарап кетті.
"Ресми ақпарат шыққан жоқ, бірақ біздегі мәлімет бойынша, ешкім зардап шеккен жоқ. Алаң үстінде ұшып жүретін өрмекші-камера (spider cam) құлады. Біз мұндай жабдықты Астанадағы құрама матчтарында да, Алматыдағы Чемпиондар лигасы ойындарында да қолданбаймыз.
УЕФА-ның жолдастық матчтерде мұндай технологияны қолдану бойынша талабы жоқ. Меніңше, Мажарстанда трансляцияны жүргізіп жатқан хост-хабар таратушы мұны өздері қосқан", - деді Бақытбеков тілшімізге берген сұхбатында.
- Яғни, бізде мұндай жағдай болуы мүмкін емес.
"Иә, кем дегенде "Қайрат" пен құраманың соңғы матчтерінде мұндай камералар болған жоқ. УЕФА-ның минималды стандарты бар - 12, 14, 16 камера қолдану талабы қойылады, бірақ осындай технологиясы барлар оны өз еркімен қосады", - деп атап өтті ол.
Сонымен қатар Qazsport директоры оқиғаның техникалық егжей-тегжейін нақтылай алмайды. Ол үшін Мажарстанлық әріптестердің ақпаратын күту керек.
"Ешкім зардап шеккен жоқ, бірақ бұл жағдайдың нақты қалай болғанына пікір білдіре алмаймыз, өйткені біз стадионның техникалық мүмкіндіктерін, оларда қандай камералар болғанын, нені және қалай орнатқанын білмейміз. Түсінікті болу үшін айтайын - біз олармен тікелей байланысқа шықпаймыз. УЕФА барлық елдерден сигнал жинап, оны бізге береді", - деді ол.
Еске сала кетейік, Мажарстан - Қазақстан матчы 3:1 есебімен алаң иелерінің жеңісімен аяқталды. Екінші таймда қазақстандық команда сапында бір ойыншы алаңнан қуылды.
Instagram-дағы бұл жарияланымды көру
