+7 (777) 001 44
99
"Қайрат" неге Чемпиондар лигасы матчін Алматыда өткізбейді?
Еске салайық, 14 тамызда "Орталық" стадионда америкалық жұлдыз Канье Уэстің концерті өтетіні туралы хабарланғаннан кейін, алматылық клуб Чемпиондар лигасының матчін өткізу үшін шұғыл түрде басқа стадион іздеуге мәжбүр болды.
Бастапқыда клуб тіпті Чемпиондар лигасына байланысты стадионды концертке беруге дайын емес екенін мәлімдеген еді, бірақ соңында ымыраға келіп, матчтің Түркістандағы аренада өтетінін хабарлады.
"Түркістан Арена" Чемпиондар лигасына дайын ба?
Түркістандағы стадион – еліміз тәуелсіздік алғаннан бері салынған үш стадионның бірі. Оның құрылысына шамамен 39 миллион доллар жұмсалған.
"Turkestan-Arena" стадионы техникалық жағынан толықтай дайын. Стадион 7 мың адамға арналған. Нысандағы барлық қызметті үйлестіру үшін арнайы ұйымдастыру штабы құрылды. Барлық инженерлік-техникалық жүйенің: акустикалық жүйе, бейнебақылау және өртке қарсы жабдықтардың жұмыс қабілеттілігі тексерілді.
УЕФА-ның VAR жүйесін енгізу жөніндегі талаптарын қамтамасыз ету мақсатында заманауи қолжетімділікті бақылау жүйесі (ҚБЖ) орнатылып, резервтік электр қуатымен қамтамасыз етілді", - деп хабарлады Түркістан облысының әкімдігі Tengri Sport-тың арена дайындығы туралы сауалына берген жауабында.
Айта кетейік, "Орталық" стадион 23 мыңнан аса адамды сыйдыра алады, ал олардың қолдауы "Қайратқа" келесі кезеңге өтуге көмектесуі мүмкін еді.
Түркістан тарихи матчке қалай дайындалып жатыр?
Стадион салынғаннан бері (2020 жылы) "Түркістан Аренадағы" ең мәртебелі кездесу 2026 жылғы наурызда Қазақстан жастар құрамасының Словакияға қарсы Еуро іріктеу ойыны болды.
Еурокубок ойындары, оның ішінде Чемпиондар лигасы бұл қалада әлі өткізілген жоқ.
"Матч өткізу кезеңінде Полиция департаменті мен Төтенше жағдайлар департаменті күшейтілген қауіпсіздік шараларын қабылдап жатыр. Қоғамдық тәртіп қатаң бақылауға алынды. Стадион айналасында және қаланың негізгі магистральдарында жол қозғалысын реттеу ұйымдастырылады.
Тыйым салынған заттарды (шыны және пластик бөтелкелер, өткір заттар) өткізбеу және психотроптық заттарды қолдануға жол бермеу бойынша профилактикалық шаралар жүргізіліп жатыр.
Стадион аумағында және оның маңында өрт сөндіру есептері мен жедел медициналық жәрдем бригадаларының тәулік бойы кезекшілігі қамтамасыз етілген. Қала тұрғындары мен қонақтарына ыңғайлы болу үшін матч аяқталғаннан кейін қосымша автобустар бөлінеді", - деді әкімдіктегілер.
Сонымен қатар, Түркістанда Болгариядан келетін шетелдік жанкүйерлерге байланысты ерекше шаралар қолданылады.
"Ресми делегацияларды, қатысушы командаларды және шетелдік жанкүйерлерді қабылдауға дайындық аясында өзара іс-қимылдың арнайы регламенттері әзірленді. Полиция органдарымен бірлесіп, футбол клубтары мен төрешілер алқасын әуежайдан тұратын жерлеріне және стадионға дейін қауіпсіз шығарып салу ұйымдастырылды.
Жанжалды жағдайлардың алдын алу үшін команда жанкүйерлерінің ағынын қатаң бөлу және оларды стадионның жекелеген секторларына орналастыру қарастырылған. Бұл ретте билеттерді сатуды және жанкүйерлерді секторларға бөлуді "Қайрат" футбол клубы жүзеге асырады. Ресми фан-клубтардың жұмысы құқық қорғау органдарының қатаң бақылауында болады, ал спорт кешені аумағында экстремизмнің кез келген көріністері мен рұқсат етілмеген насихатқа тосқауыл қойылады", - деп түйіндеді әкімдік.
Еске салайық, Чемпиондар лигасындағы "Қайрат" - "Левски" матчі 11 тамызда өтеді. Алғашқы ойыннан кейін алматылықтар 0:1 есебімен есе жіберіп тұр.
"Концерт маңыздырақ" - "Қайрат" бапкері Алматыдағы ЧЛ орнына Канье Уэсттің кеші туралы
