Орталық коммуникациялар қызметінде өткен брифингте Қазақстанның туризм және спорт министрі Ербол Мырзабосынов елімізде UFC турнирін өткізу мүмкіндігі туралы сұраққа жауап берді.
Министр келіссөз жүріп жатқанын растап, нақты нәтижесін қарашаның аяғында айтатынын мәлімдеді.
"Жыл басынан бері UFC турнирі бойынша бірнеше келіссөз бен жұмыс кездесуін өткіздік, келіссөз жүріп жатыр. Айдың аяғында 2027-2028 жылдары Қазақстанда UFC турнирін өткізуге қатысты қандай шешімге келгенімізді егжей-тегжейлі хабарлаймыз. Барлық жұмыс атқарылды, ай соңында қорытындысын айтамыз", - деді Ербол Мырзабосынов.
Бұған дейін 10 қарашада Алматыға UFC-дің ресми делегациясы келгені хабарланған. Америкалық ұйым алдымен Қазақстанда Zuffa Boxing бокс турнирін (UFC президенті Дана Уайт пен Турки Аль аш-Шейхтің бірлескен жобасы), ал кейін 2027 жылы толыққанды UFC турнирін өткізуді жоспарлаған.
Қазақстандағы турнир туралы UFC президенті әрі бас директоры Дана Уайт та пікір білдірген еді. Ол баспасөз мәслихатында Қазақстанда жекпе-жек кешін өткізу бойынша жұмыс жүріп жатқанын және ол жуырда өтуі мүмкін екенін айтты.
Қазақстанда UFC турнирі 6 жылдан аса уақыт бойы дайындалып жатыр
Еске сала кетейік, Қазақстандағы алғашқы UFC турнирі бастапқыда 2020 жылғы маусымға жоспарланған. Сол кезде оны елордадағы "Астана Арена" стадионында өткізу көзделген, ал басты жекпе-жекте ресейлік Пётр Ян мен бразилиялық Марлон Мораес кездесуі тиіс болған. Бұл ақпаратты Янның және қазақстандық бірқатар спортшының мүддесін қорғайтын танымал менеджер Саят Әбдірахманов растаған.
Алайда пандемия салдарынан бұл жоспар іске аспай қалды: турнирлердің көбі тоқтатылып, кейін БАӘ мен АҚШ-қа ауыстырылып, көрерменсіз өткізілді.
#UFCKazakhstan has a 🔥 main event headed its way. Full story from @Farah_Hannoun: https://t.co/CojjbPQmjz https://t.co/I54cdPyjuQ
— MMA Junkie (@MMAJunkie) March 4, 2020
2024 жылы аралас жекпе-жек бойынша сарапшы Михаил Краймер Қазақстанда турнир өткізу үшін UFC-де елімізден чемпион шығуы керек екенін айтқан болатын. Сол кезде ол UFC сырттағы турнирлерді нөмірлемейтінін, демек Қазақстанда титулдық жекпе-жек өткізу мүмкін емес екенін атап өткен.
Сонымен қатар 2025 жылғы мамырда OCTAGON қазақстандық аралас жекпе-жек лигасының президенті Нұраддин Садықов UFC басшысы елде турнир өткізу туралы Дана Уайтпен келіссөз жүріп жатқанына біраз болғанын айтты.
“Ақша табу керек“: Асу Алмабаев UFC-дегі жекпе-жегі алдында мәлімдеме жасады