Футбол аңызы атанған 41 жастағы ойыншы ұлттық құрама сапындағы мансабын аяқтау туралы шешімін жариялағаннан кейін, бапкер Криштианумен Ұлттар лигасындағы алғашқы матчтің алдында сөйлескенін айтты.
"Бұл - оның жеке шешімі. Бізде ұлттық құрамаға алғашқы шақыртуға дейін бұл мәселені талқылауға мүмкіндік болды. Мен оған қал дедім, өйткені ол маған керек еді. Алайда мен оның шешімін қабылдауым керек", - деп келтіреді дереккөз Жорже Жезуштің сөзін.
Еске салайық, кейінгі матчтердегі ойын уақытына байланысты Роналду мен бапкер арасында келіспеушілік туындаған болатын. Криштиану Ұлттар лигасы аясында Уэльске қарсы кездесуде 67 минут ойнаса, Норвегияға қарсы матчті толығымен қосалқы құрам орындығында өткізді.
Данияға қарсы келесі матчте де бапкер Роналдуды негізгі құрамға қоспады. Осыдан кейін футболшы ұлттық құрама орналасқан жерден кетіп, бас бапкерге қатысты айыптауларын жариялады.
Бұл дауға байланысты Криштиану Португалия футбол федерациясы шешімімен айыппұл арқалап, дисквалификацияға ұшырады. Ал бір айдан кейін ол ұлттық құрама сапындағы мансабын аяқтау туралы шешім қабылдағанын мәлімдеді.
Роналдудың ұлттық құрамадағы алғашқы матчінде оған қарсылас болған бұрынғы футболшы Қайрат Нұрдәулетов мансаптың мұндай аяқталуы футболшының өзіне де, Португалия футбол федерациясына да абырой әпермейтінін айтты.
"Әрине, бұлай болмағанын қалар едік. Жаттықтырушымен болған бұл жағдай оған да, жалпы Португалия федерациясына да абырой әпермейді. Меніңше, олар бәрін басқаша жасауы керек еді.Криштиану сияқты футболшыға құрмет көрсетіп, оның ұлттық құрамадағы карьерасын әдемі аяқтауына жағдай жасау керек еді. Бұл - менің жеке пікірім. Көпшілік оны паңдығы үшін айыптап жатады, бірақ меніңше, ол бұған лайықты, өйткені әлемдік және португал футболы үшін орасан зор еңбек сіңірді", - деді ол Tengri Sport басылымына берген сұхбатында.
Роналдудың Португалия құрамасындағы жолы
Қазіргі заманның үздік шабуылшыларының бірі Португалия құрамасындағы алғашқы матчін 2003 жылғы 20 тамызда Португалияның Шавиш қаласындағы "Эштадиу Мунисипал" стадионында өткізді. Сол жолдастық кездесуде Қазақстан құрамасы қарсылас болған еді.
Жалпы, Роналду Португалия ұлттық құрамасы сапында 234 матч өткізіп, 146 гол соққан.
Португалия құрамасы футбол тарихында алғаш рет 2016 жылы Еуропа чемпионы атанды. Сонымен қатар 2019 және 2025 жылдары Ұлттар лигасының жеңімпазы болды.