Махмұд Сабырханның Азияда медалі үшін жекпе-жегі тартысты өтті

Фото: Қазақстан бокс федерациясы

55 келіге дейінгі салмақ дәрежесінде өнер көрсететін қазақстандық боксшы Махмұд Сабырхан 2026 жылғы Азия ойындарының 1/4 финалында жеңіске жетті, деп хабарлайды Tengri Sport.

Азияданың жартылай финалына жолдама беретін бәсекеде қазақстандық әлем чемпионына оңтүстіккореялық боксшы Жаенг Шин қарсы тұрды.

Жекпе-жек барысы

Бірінші раунд өте белсенді басталды: қос боксшы да ашық айқастан тайсалмады. Сабырхан қарқынды жұмыс істеп, дәл комбинациялар жасау арқылы қарсыласын арқанға тықсырды. Шин қарсы шабуыл жасап, шегіне жүріп жауап қайтаруға тырысқанымен, қазақстандық боксшы прессингті үдетіп, жақын қашықтықта ұпай жинауды жалғастырды.

Қолының ұзындығына байланысты корей боксшысы раунд соңына қарай жиі соққы дарыта бастады, алайда кезекті айқаста төреші оған нокдаун есептеді. Соған қарамастан, төрешілер Шиннің басымдығын танып, раундты соған берді - 4:1.

Екінші раунд одан да қатал өтті. Сабырхан қарқынды үдетіп, қарсыласын шаршы алаңның әр бұрышында қуа жүріп, бұрынғыдан да жылдам шабуылдай бастады. Екінші раундта төрешілердің шешімі қақ жарылып, басымдық қазақстандыққа берілді - 3:2.

Үшінші раунд та жақын қашықтықтағы шиеленісті тартысқа толы болды. Сабырхан ауыр комбинациялар сериясын жасап, қарсыласын екінші мәрте нокдаунға түсірді. Рефери жекпе-жекті жалғастыруға рұқсат берді. Қазақстандық боксшы қарқынды бәсеңдетпей, қарсыласына соққы жаудырып, шабуылды жалғастыра берді.

Үш раундтың қорытындысы бойынша Сабырхан төрешілер шешімімен жеңіске жетті - 3:2.

Айта кетейік, Азияда регламенті бойынша үшінші орынға жекпе-жек қарастырылмаған. Яғни, Махмұд Сабырхан жартылай финалға жолдама алу арқылы турнирдің кем дегенде қола жүлдесін қамтамасыз етті.

Азияданың алдыңғы кезеңінде Махмұд Сабырхан ирандық боксшы Мехди Каземимен кездескен болатын. Алғашқы секундтардан-ақ Сабырхан басымдыққа ие болды. Екінші және үшінші раундтарда ол қарсыласын екі рет нокдаунға жіберді. Нәтижесінде қазақстандық 5:0 есебімен сенімді жеңіске жетті.

Instagram-дағы бұл жарияланымды көру

Kazakhstan Boxing Federation (@boxingkazakhstan) жариялаған жазба

Еске сала кетейік, бұған дейін Махмұдтың туған інісі, әлем чемпионы Төрехан Сабырхан да 2026 жылғы Азия ойындарының жартылай финалына шыққан болатын. Ол Ирак өкілі Али Ас-Сараимен жұдырықтасып, оны бірінші раундта-ақ нокаутқа түсірді.