Назым Қызайбай Қазақстан үшін Әлем кубогінің екінші медалін жеңіп алды

Бокстан Қазақстанның үш дүркін әлем чемпионы Назым Қызайбай Қытайда өтіп жатқан Әлем кубогі кезеңінің жартылай финалына шықты, деп хабарлайды Tengri Sport.

54 келіге дейінгі салмақ дәрежесінің ширек финалында танымал қазақстандық спортшы Польшаның 25 жастағы өкілі Виктория Рогалинскаямен жұдырықтасты.

Алғашқы раундта отандасымыз барлық төрешінің шешімімен сенімді жеңіске жеткенімен, екінші кезеңде бес төрешінің үшеуі басымдықты қарсыласына берді.

Шешуші кезеңде Назым төрешілердің көпшілігінің көңілінен шығып, қайтадан басым түсті.

Қорытынды: Назым Қызайбай 4:1 есебімен жеңіске жетті.

Айта кетейік, жартылай финалға шығу қазақстандық боксшыға кем дегенде қола медальды қамтамасыз етеді, өйткені турнир регламенті бойынша үшінші орын үшін жекпе-жек өткізілмейді.

Назым Қызайбай – Қазақстанның ең көп атақ алған боксшысы

Еске сала кетейік, 32 жастағы Назым Қызайбайдың еншісінде бокстан әлем чемпионаттарының бес медалі бар, оның үшеуі - алтын, сондай-ақ 2024 жылғы Париждегі жазғы Олимпиаданың қола жүлдесі бар.

Бокста Қазақстан өкілдерінің ешқайсысы бұдан көп әлем чемпионатында жеңіске жетпеген.

Қытайдағы Әлем кубогінде Назым өзінің негізгі марапаттарын иеленген салмақтан жоғары - 54 келіге дейінгі салмақ дәрежесінде өнер көрсетіп жатыр. Турнирдің алғашқы жекпе-жегінде қазақстандық спортшы Париж Олимпиадасының тағы бір қола жүлдегері, оңтүстіккореялық Им Э Джиді ойсырата жеңді.

Бұған дейін Қазақстан құрамасының Қытайдағы Әлем кубогіндегі алғашқы медалін Дина Исламбекова қамтамасыз еткен болатын - ол 80 келіден жоғары салмақ дәрежесінде жартылай финалға шықты.

World Boxing ұйымдастырған Гуйяндағы (Қытай) бокстан Әлем кубогының кезеңі 21 маусымда аяқталады.

Қазіргі уақытта Қазақстан құрамасының алты боксшысы: Нұрбек Оралбай, Санатали Төлтаев, Сабыржан Аққалықов, Серік Теміржанов, Тимур Қабдешев және Наталья Богданова жарыстан шығып қалды.

Сондай-ақ бүгін 1/4 финалға Қазақстанның екі дүркін әлем чемпионы Алуа Балқыбекова жолдама алды.