Рыбакина қатысып жатқан турнирде теннисшілер вирус тарап жатқанын айтты

Испания астанасында Қазақстанның бірінші ракеткасы Елена Рыбакинаның қатысуымен беделді WTA 1000 сериялы турнирі өтіп жатыр. Қазақстандық теннисшінің қарсыластарының айтуынша, қатысушылар арасында вирус таралған - олардың бірі тіпті кортта жүрегі айнып, құсып жіберген, деп хабарлайды Tengri Sport.

1/16 финалда Сорана Кырстяға қарсы өткен матчтың екінші сетінде "Ролан Гарростың" соңғы чемпионы, америкалық Кори Гауфф корттағы гүлдердің ішіне құсып жіберген.

Ол матчты жеңіспен аяқтап, ойыннан кейін Мадридте вирус таралып жатқанын мәлімдеді.

"Таңертең бәрі жақсы болған. Түнде біртүрлі сезімде болдым: мазасыздық, қобалжу – мелатонин ішіп, ұйықтап қалдым. Жалпы, ағзамда бірдеңе болып жатқанын түсіну қиын, әдетте ешкімге ештеңе айтпаймын. Бірақ бұл жолы физиотерапевтпен кеңесу керек еді.

Матчтың бір сәтінде қазір құлап қалатындай сезіндім. Ойын барысында құсып жіберетіндей болдым. Бір вирус тарап жүргені анық, асқазан проблемасы тек менде ғана емес. Оның үстіне, қалада да вирус жүрген сияқты – бәрі содан басталды-ау деп ойлаймын", - деп келтіреді америкалық спортшының сөзін puntodebreak.com басылымы.

Бұдан бір күн бұрын тағы бір танымал теннисші – әлемнің бұрынғы бірінші ракеткасы Ига Швёнтек те осыған ұқсас белгілерге шағымданған . Ол Мадридтегі матчын соңына дейін өткізе алмады.

"Мен вирус жұқтырып алдым, ойнау өте қиын болды. Бұл вирус ойыншылар арасында, бәлкім, басқа жерлерде де тарап жүр. Бойымда мүлдем күш-қуат болмады, нөлге тең десем де болады. Ауру белгілері туралы айтпай-ақ қояйын. Тіпті су іше алмадым, өйткені асқазаным толып тұрғандай сезіндім", - деді ол ойыннан екі сағат өткен соң микст-аймақта.

Вирус Елена Рыбакинаға әсер етіп жатыр ма?

Еске сала кетейік, қазақстандық әлемнің екінші ракеткасы Мадридтегі турнирдің 1/8 финалына шығып үлгерді. Екі матчта да ол үш сет ойнауға мәжбүр болды, бірақ соңында үздік 16 теннисшінің қатарына енді.

Әлеуметтік желілерде және баспасөз мәслихаттарында қазақстандық теннисші ықтимал вирус немесе улану туралы ештеңе айтқан жоқ (инсайдерлер теннисшілердің сырқаттануына асшаяндар себеп болуы мүмкін деп жазды).

Tengri Sport тілшісі Қазақстан теннис федерациясынан Рыбакинаның денсаулық жағдайын білуге тырысты, бірақ спортшының денсаулығы туралы ақпарат құпия екендігі туралы жауап алдық.

Айта кетейік, 27-сінен 28-іне қараған түні Елена Рыбакина 1/8 финалда Австрия өкілі Анастасия Потаповаға қарсы ойнайды.