Рыбакина Римдегі “мыңдық“ турнирдің ширек финалында әлемнің 10-ракеткасынан жеңілді

Әлемнің екінші ракеткасы, қазақстандық теннисші Елена Рыбакина Римде өткен WTA 1000 санатындағы грунт турнирінің ширек финалында украиналық Элина Свитолинаға жол берді, деп хабарлайды Tengri Sport тілшісі Championat басылымына сілтеме жасап.

Теннисшілер кортта 2 сағат 22 минут өткізді. Матч әлемнің 10-шы ракеткасының жеңісімен 2:6, 6:4, 6:4 есебімен аяқталды.

Осы уақыт ішінде Свитолина бес рет қосарланған қателік жіберіп, бір эйс жасады және 13 брейк-пойнттың 4-еуін сәтті пайдаланды. Рыбакина болса иеленген 20 брейк-пойнттың 4-еуін ғана жүзеге асыра алды. Ол бес рет қосарланған қателік жасап, жеті эйс орындады.

Римдегі беделді грунт жарысының жартылай финалында Свитолина польшалық Ига Швёнтекпен кездеседі.

Бұған дейін қазақстандық спортшы әлемнің бұрынғы бірінші ракеткасы, чехиялық Каролина Плишкованы тас-талқан етіп жеңген болатын (6:0; 6:2). Матчтан кейін Рыбакина трибуналарға алғыс айтып, жанкүйерлер арасында балалардың көптігін ерекше атап өткен еді.

Естеріңізге сала кетейік, Қазақстанның үздік теннисшісі Римдегі WTA 1000 сериялы турнирінде 2023 жылы жеңімпаз атанған болатын.