“Сұмдық қателік“: Рыбакина Мадридтегі турнирде әділетсіздікке тап болды

Мадридтегі WTA 1000 сериясындағы турнирдің 1/16 финалында қытайлық Чжэн Циньвэньге қарсы өткен матчта Елена Рыбакина төрешіге қарсыласының эйсіне қатысты қате шешім үшін шағымданды. Жанкүйерлер қазақстандық теннисшіні әлеуметтік желілерде қолдап жатыр, деп хабарлайды Tengri Sport.

Жағымсыз жағдай екінші сетте, Рыбакинаның пайдасына 4:3 есебі тіркелген кезде, қарсыластың соққысы кезінде болды.

Циньвэньнің соққысынан кейін автоматты жүйе эйсті тіркеп, оған ұпай берді. Рыбакина төрешіге шешімді қайта қарау қажеттігін қызуқандылықпен дәлелдеуге тырысты.

"Мен төмен түсе алмаймын", - деді төреші.

"Оның алаңнан шығып кеткенін көрмей тұрсыз ба? Мені келеке етіп тұрсыз ба? Бұл әзіл емес. Жүйе қателесіп тұр. Бұл әзіл емес. Доп сызыққа тиген жоқ. Бұл мүлдем дұрыс емес шешім", - деді Елена.

Матч комментаторы тікелей эфирде қазақстандық теннисшінің әділетсіздікке тап болғанына назар аударды.

"Рыбакина сөзінің жаны бар сияқты, бірақ төрешінің айтуынша, бейнежазбаларды қарау қажеттілігіне байланысты олар дәл соған сенуге мәжбүр", - деп естіледі эпизод жазбасында.

Эпизодқа жазылған пікірлерде жанкүйерлер де Еленаны қолдап жатыр.

"Егер Елена доптың сызыққа түсуі туралы төрешінің шешімімен келіспесе, демек, бұл шынымен де маңызды мәселе. Елена ешқашан шағымданбайды. Көзбен қарағанда доп алаңнан тыс жерде болды. Бірақ автомат оның алаң ішінде екенін көрсетті. Жақсы жаңалық - Елена сабыр сақтап, матчты жеңіп шықты";

"Егер төрешілер ештеңе істей алмаса, олардың не қажеті бар?";

"Өкінішті-ақ, нағыз аут! Ол қателікті түзетуге тура келетінін білгендіктен, төмен түсіп көргісі келмеді! Ешқандай батылдық жоқ, немқұрайлы төреші, машиналар да қателеседі!";

"Төрешінің сұмдық қателігі!! Өз қатесін түзету үшін төмен түспеуі - бұл кішіпейілдіктің жоқтығын көрсетеді. Ол қолдауға лайық еді. Егер бұл финал болса, оның фавориті кім екенін білер едік. Турнир ұйымдастырушылары, сіздерге ұят! Егер алдағы уақытта бұған қатысты шара қолданбасаңыздар, өкінішті", - деп жазды жанкүйерлер.

Жағымсыз жағдайға қарамастан, Елена Рыбакина камбэк жасап, матчта жеңіске жетіп, 1/8 финалға жолдама алғанын айта кетейік. Онда ол Австрия өкілі Анастасия Потаповамен кездеседі.

Рыбакинаның қытайлық Циньвэньді жеңуі оны осы маусымдағы жеңісті матчтер саны бойынша тек әйелдер арасында емес, бүкіл әлемдік турда көшбасшы етті.

Мадридтегі турнирге келетін болсақ, қатысушылардың айтуынша онда вирус таралған - спортшылардың бірі тіпті кортта жүрегі айнып, құсып жіберген.