WTA мәлімдемесіне сәйкес Елена Рыбакина АҚШ-тың Индиан-Уэллс қаласында жүрген кезінде денсаулығына байланысты қорытынды турнирге қатыспау туралы шешім қабылдаған. Қазақстандық спортшы онда былтырғы чемпиондық атағын қорғауға тиіс еді.
"Әрине, таңғалдым, бірақ оның биылғы маусымы физикалық және моральдық тұрғыдан өте ауыр болғанын түсінемін. Көптеген қиын матчтер мен ұзақ турнирлер өтті, оның үстіне ол Азияда көп ойнады. Бірақ ойланып қарасам, бұл шешіміне таңғалмаймын.
Қалай болғанда да, маусым керемет өтті. Ол әлемдік рейтингте бірінші орынды иеленетініне кепілдік берді. Сондықтан денсаулығына көңіл бөліп, жақсылап демалып, келесі маусымға жаңа күшпен оралу туралы шешімі дұрыс", - деді Соболенко First and red басылымына.
Еске салайық, Елена Рыбакина турнирден шығатыны туралы жаңалық қарсаңында әлеуметтік желіде қазақстандық теннисшінің жарияланбаған сұхбатынан үзінді тараған еді. Ол өзін жайсыз сезінгенін айтып, сұхбатты тоқтатқан.
[DEPORTES] «Өзімді жайсыз сезініп тұрмын»: әлемнің 1-ракеткасы, қазақстандық теннисші Елена Рыбакина «денсаулық мәселелеріне» байланысты WTA Finals-қа қатыспайтынын жарияламас бұрын, сұхбатты кенеттен үзіп, тікелей эфир кезінде кетіп қалды. 📹 @CANALPLUS_SPORT https://t.co/yeZlNA43H4
— ElCanciller.com (@elcancillercom) 8 қараша, 2026
Айта кетейік, Рыбакина болмаған соң Соболенко қорытынды турнирдің басты фаворитіне айналды.
Қазақстандық спортшының үздік сегіздіктегі орнын украиналық Марта Костюк иеленді.
Соболенко - Рыбакина: әлемдік теннистің жаңа классикасы
Жанкүйерлер қорытынды турнирде әлемнің ең мықты екі теннисшісі - Арина Соболенко мен Елена Рыбакина арасындағы текетірестің жалғасын күткен еді. Олар осыған дейін 18 матч өткізіп (есеп 10:8 беларусьтік спортшының пайдасына), бұған дейін US Open финалында Рыбакина жеңіске жеткен болатын.
Рыбакина басты финалдарда тұрақты түрде жеңіске жетіп келеді. Қазақстандық теннисші 2025 жылғы қорытынды турнирден бастап Australian Open және US Open шешуші матчтерінде қарсыласынан басым түссе, Арина "Мастерс" турнирлерінде - Майамидегі жартылай финал мен Индиан-Уэллс финалында үстемдік еті.
Соболенконың Рыбакинаға деген көзқарасы
Екі теннисші әдетте бір-бірі туралы құрметпен пікір білдіреді. Алайда эмоцияға берілген сәттерде олардың арасында өзгеше жағдайлар да болған.
Елена Аринаны алғаш рет жеңгеннен кейін (2023 жылғы наурызда АҚШ-тың Индиан-Уэллс турнирінде) Соболенко марапаттау рәсімінде нағыз шоу жасады. Қазақстандық теннисші қарсыласына финал үшін ризашылық білдіріп жатқанда, ол кенет тілін шығарып, трибунадағы жанкүйерлерді күлдірді.
Былтыр WTA қорытынды турнирінің финалында да Соболенконың жүйкесі сыр берді. Бұл кездесуде де қазақстандық теннисші жеңіске жеткен еді. Рыбакина кезекті сәтті соққы жасағаннан кейін Арина өз командасына: "Жылына бір рет таяқ та атады" деп айқайлаған болатын.
Tengri Sport-қа берген сұхбатында қазақстандық теннисші бұл сөз оған бағытталса да, қарсыласына ешқандай реніші жоқ екенін айтты.
"Матчтен кейін маған видеоларды жіберді, бірақ ол мәнмәтіннен үзіп алынған еді. Біз Аринамен көп рет, тіпті биылдың өзінде бірнеше мәрте ойнадық, сондықтан бұған аса мән бермеймін. Аринаға да, оның командасына да көзқарасым жақсы, сондықтан бұл сөздер маған бағытталған болса да, жүрегіме жақын қабылдамаймын", – деді Рыбакина.
Айта кетейік, WTA қорытынды турниріне қатысудан бас тартқанына қарамастан, Елена Рыбакина маусымды әлемдік рейтингтің бірінші сатысында аяқтаған алғашқы қазақстандық атанады. Соболенко мен өзге қарсыластары турнирде жеңіске жеткен күннің өзінде Рыбакинадан бірінші орынды тартып ала алмайды.