Төрехан Сабырхан өзбекстандықты ойсырата жеңіп, Азиада финалына шықты

Жартылай финалдық жекпе-жекте қазақстандық жұлдызды боксшы өзбекстандық Шавкатжон Болтаевпен кездесті.

Жекпе-жек барысы

Сабырхан бірінші раундты белсенді бастады: ол қарсыласын орта қашықтықта комбинациялармен соққының астына алса, қарсы шабуыл кезінде шегініп жүріп қарымта қайтарды. Болтаев көбіне дара соққыларға иек артып, денені нысанаға алуға тырысты. Төрешілер бірінші раундта жеңісті бірауыздан Төрехан Сабырханға берді – 5:0.

Екінші раундта қазақстандық боксшы аяқпен керемет жұмыс істеп, қарсыластың барлық дерлік шабуылынан сытылып кетіп отырды. Сабырханның өзі де түрлі деңгейде дәл комбинациялар жасай білді. Ол Болтаевтың қорғанысын апперкотпен бұзып өтіп, қарымта соққыларды сәтті бөгеді. Төрешілер екінші раундты да қазақстандық спортшының еншісіне жазды – 5:0.

Үшінші раунд Сабырханның бастан бағыттаған ұзақ соққылар сериясымен басталды. Өзбекстандық боксшы жауап қайтаруға тырысқанымен, оның барлық соққысы қорғанысқа тиіп, айтарлықтай шабуыл жасай алмады. Бір минуттан кейін боксшылар ринг ортасына шығып, жақын қашықтықта соққы алмасты. Болтаев бірте-бірте бастаманы қолға алып, қазақстандықты арқанға қарай ығыстырғанымен, біздің боксшы қорғаныс пен қарымта шабуылдың шеберлік сабағын көрсетіп, еркін қимылдады.

Үш раундтың қорытындысы бойынша Төрехан Сабырхан 5:0 есебімен айқын басымдықпен жеңіске жетіп, Азиаданың финалына жолдама алды.

Естеріңізге сала кетейік, өткен кезеңде Төрехан Сабырхан Ирак өкілі Али Ас-Сараимен жұдырықтасқан болатын. Ол небәрі бір минуттан соң қарсыласын денеден жасалған ауыр соққымен нокдаунға түсірді. Қарсыласы орнынан тұра алмай, жекпе-жек мерзімінен бұрын аяқталды.

Айта кетейік, бұған дейін бокстан Қазақстан құрамасына Алуа Балқыбекова, Наталья Богданова және Махмұд Сабырхан қола медаль сыйлады.

Ал Азиаданың алтын медалі үшін Қазақстан құрамасының капитаны Айбек Оралбай бақ сынайды, ол финалға айқын басымдықпен шыққан болатын.