Килиан Мбаппе әлем чемпионатының үздік ойыншысын атады

Франция құрамасы мен мадридтік "Реалдың" жұлдызды шабуылшысы Килиан Мбаппе футбол аңыздары Лионель Месси мен Криштиану Роналдуды өзінен жоғары қойды, деп хабарлайды Tengri Sport.

Танымал шабуылшы әлем чемпионаттары тарихындағы үздік сұрмергендер рекордын жаңарту жоспары туралы айтып берді.

Қазіргі таңда әлем біріншіліктерінде гол салу бойынша рекорд Мирослав Клозе мен Лионель Мессиге тиесілі - екеуінің де еншісінде 16 доптан бар. 27 жастағы француздың есебінде әзірге 14 гол.

"Мессидің гол соғатынын білдім. Ол - Месси, ол әрдайым гол соғады. Мен де командамның барынша алысқа баруына көмектесу үшін гол соғуды жалғастырамын. Әрине, гол соғу арқылы рекордқа да жақындай түсемін", - деп Мбаппенің сөзін инсайдер Фабрицио Романо келтіреді.

Сондай-ақ ол өзі, Лионель Месси, Эрлинг Холанд немесе Харри Кейннің қайсысы мықты деген сұраққа жауап берді.

"Месси мен Криштиану Роналду - ең үздігі", - деп жауап берді Мбаппе.

Месси ӘЧ-2026-ны хет-трикпен бастады

38 жастағы Лионель Месси Алжирге қарсы матчтың 76 минутында үш гол соғып, Мбаппеден озып кетті және ӘЧ тарихындағы үздік сұрмергендер тізімінде көш бастады: қазір оның да, неміс экс-шабуылшысы Мирослав Клозенің де еншісінде 16 голдан бар.

Криштиану Роналду голсыз қалды

Португалиялық жұлдызға келетін болсақ, ол Конго ДР-на қарсы алғашқы матчта нәтижелі іс-әрекетімен көзге түсе алмады: статистика бойынша, ол үш рет соққы жасауға тырысқанымен, оның біреуі де қақпаға дәл тимеді. Бұған қоса, ол гол соғатын сәттер ұйымдастыра алмады, ал алға бағытталған пастар мен алдап өтулер саны өте төмен болды.

Тұтастай алғанда, Роналдуның ойыны команда үшін шешуші бола қоймады. Жаттықтырушы Роберто Мартинес басқа негізгі ойыншыларды алмастырғанына қарамастан, капитанды ойын соңына дейін алаңда қалдырды.

Бұған дейін аргентиналық тележүргізуші Флоренсия Пенья шоулардың бірінің тікелей эфирінде футболшы Лионель Мессидің әкесі қайтыс болғанын хабарлағаны белгілі болған еді.

Ал Мысыр құрамасының жұлдызды шабуылшысы Мохаммед Салах әлем чемпионатында Жаңа Зеландияға қарсы ойында командасының жеңіс голын соқты.