Модрич ӘЧ-да Роналдудан жеңілгеннен кейін мансабын аяқтау туралы пікір білдірді

Хорватия құрамасының аңызға айналған жартылай қорғаушысы Лука Модрич Әлем чемпионатынан шығып қалғаннан кейін мансабын аяқтауға қатысты сұраққа жауап берді, деп хабарлайды Tengri Sport.

Лука Модрич 2026 жылғы Әлем чемпионатында Португалия құрамасына қарсы матчтан соң мансабын аяқтау-аяқтамау туралы сұраққа жауап қатты.

Атақты футболшы қазір бұл туралы айтатын уақыт емес екенін жеткізді.

"Қазір менің болашағым туралы сөйлесетін уақыт емес. Жақында бәрін білетін боласыздар", - деп келтіреді Модричтің сөзін инсайдер Фабрицио Романо.

Еске сала кетейік, Хорватия құрамасы футболдан Әлем чемпионатының 1/16 финалында Португалия құрамасына есе жіберді. Матчтің 53-минутында хорватиялық Иван Перишич есеп ашқан болатын.

Кейін, 68-минутта Португалия құрамасының жұлдызы Криштиану Роналду пенальтиден есепті теңестірді. Португалдықтар 90+4-минутта алға шықты. Гонсалу Рамуш пасты қабылдап алып, дәл соққы бағыттады.

Ойын соңында Йошко Гвардиол есепті теңестіріп, кездесу экстра-таймға ұласуы мүмкін еді, алайда төрешілер офсайд тіркеп, гол есептелмеді.

Кездесудің қорытынды есебі - 2:1, Португалия жеңіске жетті.

Лука Модрич - футбол аңызы

Лука Модрич жетістіктері миллиондаған адамды шабыттандыратын әлемдік футболдың аңызы. Хорватия құрамасының жартылай қорғаушысы өз буынының ең ұлы ойыншыларының бірі.

Клубтық деңгейде Модрич мадридтік "Реалдағы" өнерімен есте қалды. 2012 жылдан бері ол "корольдік клубпен" бірге рекордтық 28 трофейге ие болды, оның ішінде 6 Чемпиондар лигасының титулы, 4 Испания чемпионаты және 5 УЕФА Суперкубогі бар.

2025 жылдың көктемінде Модрич мадридтік "Реалдан" кетіп, италиялық "Миланмен" келісімшартқа отырды.

2018 жылы Модрич Месси мен Роналдудың гегемониясын бұзып, "Алтын допты" жеңіп алған алғашқы ойыншы атанды, сондай-ақ FIFA The Best және УЕФА нұсқасы бойынша Еуропаның үздік ойыншысы марапаттарын иеленді.

2018 жылғы Әлем чемпионатында ол Хорватияны тарихи күміс жүлдеге жеткізіп, турнирдің "Алтын добын" иеленсе, 2022 жылы командамен бірге қола жүлдені жеңіп алды.

ӘЧ-2026: испаниялық қақпашы аңызға айналған Буффон мен Касильястың рекордын жаңартты

Үздік құрама ӘЧ-2026-дағы сәтсіздіктен кейін бапкерін қызметінен босатты

Криштиану Роналду Әлем чемпионаты плей-офф кезеңіндегі жеңісін қаза тапқан әріптесіне арнады