+7 (777) 001 44
99
Қырғызстандық аралас жекпе-жек файтері Медет Жээналиев Ыстықкөлде балаларды құтқарам деп көз жұмды, - деп хабарлайды Tengri Sport тілшісі РИА Новости-ге сілтеме жасап.
1995 жылғы қырғызстандық спортшы көлге батып бара жатқан кәмелетке толмаған қызды құтқару үшін суға секірген.
"Бактуу-Долоноту ауылындағы жағажайда кәмелетке толмаған төрт қыз демалып жүрген. Олардың бірі суға шомылу кезінде бата бастаған. Медет Жээналиев досымен бірге көмекке ұмтылған. Қызды құтқарып қалды, бірақ Жээналиевтің өзі қаза тапты", - деп жазды сайт Ыстықкөл аудандық ішкі істер бөлімінің баспасөз қызметіне сілтеме жасап.
Оқиға орнында болған Медеттің ауылдасының айтуынша, сол күні көлде қатты жел соғып тұрған.
"Сол күні жағаға бардық. Кешкі сағат 5–6 шамасы болатын. Күн ашық болғанымен, қатты жел тұрды. Пирсте үш қыз отырды. Біз аздап доп ойнап, суға түстік. Толқын қатты болғандықтан, кетуге бел буып, қыздарға абай болуды ескерттік.
Біз сәл ұзағанда жағада айқай шықты. Қыздардың бірі бата бастапты. Медет аға бірден жүгіріп барып, пирстен секіріп кетті. Мен де соңынан жүгірдім, бірақ суға жағадан кіріп, қызды ұстап алып, кері жүздім. Жағаға жақындап қалғанда байдарка мінген ер адам шығуға көмектесті. Дәл сол сәтте Медет көзден таса болды", - деп келтіреді ауылдасының сөзін Sputnik.
Кәсіби MMA-да төрт жекпе-жек өткізген спортшының денесі қайғылы оқиғаның ертесіне табылды.
Instagram-дағы бұл жарияланымды көру
