+7 (777) 001 44
99
Кабо-Верде құрамасының "Возинья" лақап атымен танымал қақпашысы Жозимар Жозе Эвора Испанияға қарсы өткен әлем чемпионатындағы матчтің басты қаһарманына айналды. Көз ілеспес сейвтер жасаған ойыннан кейін оның әлеуметтік желідегі парақшасына бірден 5 миллион адам жазылды, деп хабарлайды Tengri Sport.
2026 жылғы әлем біріншілігінің басты сенсацияларының бірі кеше тіркелді. Топтық кезеңнің алғашқы матчінде Еуропаның қазіргі чемпиондары әрі турнирдің басты фавориттерінің бірі Африка маңындағы аралдардан келген команданың қақпасына гол соға алмады.
Матч есебі 0:0 болып аяқталды, ал "Матчтің үздік ойыншысы" марапатын Кабо-Верденің 40 жастағы қақпашысы Возинья әділетті түрде иеленді.
Ресми статистикаға сәйкес, ол 7 сейв жасап, испандықтардың соққыларына тосқауыл қою үшін бірнеше мәрте қақпадан шығып, сәтті ойнаған.
Финалдық ысқырық естілгенде қақпашы эмоциясын жасыра алмады.
Instagram-дағы бұл жарияланымды көру
Возиньяның ерлігі - жанкүйерлер реакциясы
Футбол жанкүйерлері беймәлім қақпашыдан жаңа жұлдызды бірден таныды. Тіпті матч барысында-ақ оның Instagram-дағы парақшасына 1,5 миллион адам жазылып үлгерді.
Қақпашының матчтен кейінгі сұхбатта бұл жаңалықты қалай қабылдағаны видеода көрсетілген.
Vozinha descobre em direto que ganhou mais de 1 milhão de seguidores 😂💙
- B24 (@B24PT) 15 маусым, 2026 жыл
(арқылы @CazeTVOficial) pic.twitter.com/s5QatXCCuh
Қазақстан уақытымен таңға қарай, яғни турнир өтіп жатқан АҚШ-та кеш батқанда, Возиньяның әлеуметтік желілеріне жазылғандар саны 5,2 миллион адамға жетті.
Бір түннің ішінде ол құраманың ең танымал ойыншысы ғана емес, Кабо-Верденің ең әйгілі тумасы болып шыға келді.
"Арман орындалды! Әлемнің ең ірі футбол аренасында Кабо-Верде намысын қорғау - сөзбен айтып жеткізе алмайтын мәртебе. Мұны баяндауға сөз жетпейді... тек мақтаныш, алғыс пен жауапкершілік қана бар", - деп жазды жаңа қаһарман танымал болғаннан кейінгі алғашқы жазбасында.
Instagram-дағы бұл жарияланымды көру
Екінші лигада ойнайды: 2026 жылғы Әлем чемпионатының жаңа жұлдызы туралы не белгілі?
Жозимар Жозе Эвора кәсіби мансабын кеш бастаған - Transfermarkt порталында оның алғашқы клубтары 2011 жылдан бастап көрсетілген. Ол кезде қақпашы 25 жаста болған. Салыстырмалы түрде айтсақ, қазақстандық футболдың жарық жұлдызы, қақпашы Темірлан Анарбеков қазір небәрі 22 жаста.
Кеш бастағанына қарамастан, Возинья еуропалық командаларға дейін жете алды. Оның ең алғашқы клубы молдовалық "Зимбру" болса, кейіннен португалиялық "Жил Висенте", кипрлік "АЕЛ" және словакиялық "Тренчин" сапында өнер көрсетті.
Instagram-дағы бұл жарияланымды көру
2024 жылдан бастап қақпашы Португалияның екінші лигасындағы "Шавиш" клубында ойнайды, ал оның трансферлік құны 50 мың еуроға бағаланған. Естеріңізге сала кетейік, оның қақпасына гол соға алмағандардың қатарында әлемнің ең қымбат футболшысы Ламин Ямаль да бар.
Возинья кәсіби футболға қадам басқаннан кейін бірден дерлік ұлттық құрама сапында дебют жасады - Камерунға қарсы алғашқы матчінде қақпасын құрғақ сақтады.
Возинья жалпы 89 кездесудің 36-сында (!) қақпасына гол өткізбеген, барлығы 81 гол жіберген. Шабуылдан гөрі көбіне қорғанысқа иек артатын құрама қақпашысы үшін бұл - таңғаларлық статистика.
Қазақстанда да осындай оқиғалар болған
Естеріңізге сала кетейік, өткен жылы қазақстандық қақпашылар да небәрі бірнеше матчтің ішінде жұлдызға айналған болатын.
Алғашқы серпіліс "Қайрат" пен Қазақстан құрамасының қақпашысы Темірлан Анарбековпен болды. Ол командасына "Орталықтағы ғажайыпты" жасауға - Чемпиондар лигасының іріктеу кезеңіндегі пенальти сериясында шотландиялық "Селтикті" жарыс жолынан шығаруға көмектесті. Бір түннің ішінде оның оқырмандар саны 133 мың адамға жетті.
Instagram-дағы бұл жарияланымды көру
Келесі кезекте "Қайраттың" жас қақпашысы Шерхан Қалмұрза болды, ол Чемпиондар лигасында мадридтік "Реалға" қарсы матчте команданың бірінші нөмірі болуға мәжбүр болды. Оған бір түнде 120 мыңға жуық адам жазылып, ол еліміздің ең танымал футболшысына айналды.
