Еуропа елінің президенті басқа жұмыс істеп жүріп көзге түсті: не болған?

НАТО Әскери комитетінің бұрынғы төрағасы, ал 2023 жылдың наурызынан бастап Чех Республикасының президенті қызметін атқарып жүрген Петр Павел кенеттен автоспорт жанкүйерлерінің назарына ілікті.

Ол Венгрия Гран-приінде фотограф болып жұмыс істеді.

"Ол сенбілік сессияларға Хунгароринг трассасына келіп, "Формула-1"-дің чехиялық фотографы Иржи Крженектің бастауымен суретке түсіріп үлгерді", - деп хабарлады motorsport.com.

БАҚ мәліметінше, бұл қосымша табыс көзі емес, мемлекет басшысының ерекше хоббиі.

"Оның ірі автоспорттық іс-шарада әуесқой фотограф ретінде көрінуі бірінші рет емес. Жақында ғана, маусым айында Павел "Ле-Манның 24 сағаты" жарысына толық фотожабдықпен барған болатын.

Шын мәнінде, НАТО-ның бұрынғы әскери төрағасы осы жылдар ішінде бірнеше мотоцикл және автожарыстарға барған. Чехияда Павел Брнодағы MotoGP мен супербайк бойынша әлем чемпионатының кезеңдерінен репортаж жасаса, NASCAR жарыстары мен "Дакар" раллиін суретке түсіру үшін АҚШ пен Сауд Арабиясына да барған", - деп жазады басылым.

Айта кетейік, Петр Павелдің өзі "Формула-1" трассасына фотограф ретінде барғаны туралы ақпарат жарияламады. Дегенмен, оның фотосуретке деген әуестігі көпшілікке жақсы таныс.

Сондай-ақ чех лидерінің өзі де жарыс көліктерін тізгіндегенді ұнататыны белгілі. 2024 жылдың мамыр айында ол мотоцикл айдап жүріп жарақат алып, бірнеше күнін ауруханада өткізген еді.