18 жастағы қазақстандық АҚШ-тағы әлем чемпионатында рекорд орнатты

Фото: instagram.com/qazathletics/

Жеңіл атлетикадан Қазақстан құрамасының өкілі Анна Черкашина АҚШ-та өтіп жатқан U-20 әлем чемпионатының финалына шығып, сырықпен секіруден елдің жаңа рекордын орнатты, деп хабарлайды Tengri Sport ҰОК баспасөз қызметіне сілтеме жасап.

18 жастағы спортшы іріктеу кезеңінде 4 метр 10 сантиметр биіктікті бағындырып, жарыстың финалына жолдама алды.

"Бұл нәтиже U-20 жас санатындағы Қазақстанның жаңа рекорды болды", - деп хабарлады ҰОК баспасөз қызметі.

Айта кетейік, Черкашина 20 жасқа дейінгі спортшылар арасындағы Азия чемпионатының финалында көрсеткен өз нәтижесін бірден 10 сантиметрге жақсартты. Мамыр айының соңында Гонконгта ол 4 метрге секіріп, күміс медаль иеленген болатын.

Орегондағы турнирдің іріктеу кезеңінде ешкім 4 метр 10 сантиметрден жоғары секіре алмады. 8 тамызда өтетін финалда 13 спортшы өнер көрсетеді.

Анна Черкашина - Қазақстан жеңіл атлетикасының үміті

18 жастағы спортшы өткен маусымда алғаш рет ересектер арасындағы ел чемпионатын жеңіп алса, биыл сол жетістігін қайталап, екі дүркін чемпион атанды.

Бұдан бөлек, ол ересектер арасындағы ел рекордына барынша жақындады - бұл рекорд 2014 жылдан бері Ольга Лапинаға тиесілі және 4 метр 20 сантиметрді құрайды.

Қазақстан жеңіл атлетика федерациясы баспасөз қызметінің мәліметінше, Анна - бағдарламаның бұл түрі бойынша жасөспірімдер арасындағы әлем чемпионатына жолдама алған ел тарихындағы тұңғыш спортшы.

Фото: qazathletics.kz

Айта кетейік, U-20 әлем чемпионатына жеңіл атлетикадан Қазақстан құрамасы сапында 11 адам енді: Богдан Гончаров, Кирилл Савченко, Глеб Гладилов, Максим Сажнев, Шерхан Егізбай, Егор Струков, Софья Киденко, Антонина Чернышова, Алина Головина, Анна Черкашина және Маргарита Стороженко.

Бұған дейін жеңіл атлетикадан Қазақстан чемпионаты кезінде тек спортшылар ғана емес, оператор да көзге түскен болатын. Шымкенттік Ибрай Төлемісов желаяқтармен бірдей жылдамдықта жүгіруінің арқасында әлеуметтік желі жұлдызына айналды.