+7 (777) 001 44
99
Матч Софияда өтеді және тамыздың 4-нен 5-не қараған түні аяқталады. Алматылықтар Болгарияға келіп, алғашқы жаттығуын өткізіп үлгерді.
"Левски" құрамы "Қайраттан" төрт есе қымбат
Болгариялық клубтың сапында Бразилия, Португалия және Венесуэладан келген мықты легионерлермен қатар, жергілікті шеберлер де бар.
Transfermarkt порталы "Левски" құрамын 37,8 миллион еуроға, ал "Қайратты" 9,2 миллион еуроға бағалап отыр.
Матчке қатыса алатын ойыншылардың ішінде "Қайрат" сапындағы ең қымбаты - 800 мың еуроға бағаланған қақпашы Темірлан Анарбеков. "Левскиде" бразилиялық Майкон мен Венесуэла құрамасының қорғаушысы Кристиан Макун ерекше көзге түседі, олардың әрқайсысы 3,5 миллион еуроға бағаланған.
Instagram-дағы бұл жарияланымды көру
"Левскидің" Қазақстандағы сәтсіз тәжірибесі
Болгарияның қазіргі чемпионы қазақстандық командалармен екі рет кездескен және бұл текетірестердегі есеп 1:1.
2003 жылдың тамызында олар УЕФА кубогының іріктеу кезеңінің алғашқы айналымында "Атыраумен" ойнаған. Алғашқы кездесуде "Левски" ойыншылары қонақта 4:1 есебімен сенімді жеңіске жетті. Өз алаңындағы қарымта матчте 2:0 есебімен басым түсіп, келесі кезеңге еш қиындықсыз өтті.
Екінші кездесу араға 10 жыл салып - 2013 жылдың шілдесінде болды. Еуропа лигасының бірінші іріктеу кезеңінде "Левски" павлодарлық "Ертіспен" күш сынасты.
Талғат Байсуфиновтың баптауындағы команда Болгарияда тең түссе (0:0), өз үйінде павлодарлықтар 2:0 есебімен жеңіске жетті. Қарсыластар 12-минуттан бастап азшылықта ойнаған болатын.
Тәжірибе "Қайрат" жағында
"Левски" соңғы рет еурокубоктердің топтық кезеңінде 2011 жылы ойнаған - сол кезде команда Еуропа лигасына жолдама алған еді. Ал алматылықтар өткен маусымды толығымен Чемпиондар лигасында еуропалық алпауыттармен шайқасып өткізіп, деңгейі жоғары командалармен терезесі тең ойнауға дайын екенін дәлелдеді.
Тіпті биылғы еуронауқан барысында "Қайрат" қағаз жүзінде мықтырақ саналған кипрлік "Омониядан" айласын асырды. Нәтижесінде, қонақтағы 1:0 есебімен жеңіліс алматылықтардың жігерін жасыта алмады, өз алаңында есе қайтарып, келесі кезеңге жолдама алды.
"Левски" - "Қайрат": тікелей трансляция
Софиядағы матч Қазақстан уақытымен 22:30-да басталады. Оны Qazsport телеарнасы мен "Қайраттың" YouTube-арнасынан көре аласыздар.
Айта кетейік, егер "Қайрат" "Левскиді" жеңетін болса, келесі кезеңде грекиялық АЕК-пен кездеседі. Төртінші раундтағы жеңіс қазақстандық футбол үшін рекорд болмақ - бұған дейін еліміздің ешбір клубы Чемпиондар лигасының іріктеуінен қатарынан екі рет өтпеген.
Instagram-дағы бұл жарияланымды көру
Бұған дейін Швейцарияның Ньон қаласында 2026/2027 жылғы Чемпиондар лигасының іріктеу кезеңінің плей-офф раундына жеребе тартылып, оған қазақстандық "Қайрат" та қатысқан болатын. Негізгі кезеңге жолдама алу үшін алматылықтар грекиялық АЕК-пен ойнауы мүмкін.
