Қазақстандық спортшы 2024 жылы GAMMA нұсқасы бойынша аралас жекпе-жектен 72,6 келіден жоғары салмақ дәрежесінде әлем чемпионатында жеңіске жеткен болатын. Сол турнирде спортшыдан алынған допинг сынама оң нәтиже берді.
ITA мәліметінше, Зейнеп шығарылған шешіммен келіскен, бұл оның шеттетілу мерзімін қысқартуға көмектескен. Алайда әлем чемпионы атағынан айырылуына бұл көмектеспеді.
"Допингке қарсы препараттар қолданылғанын ерте мойындауына байланысты спортшы GAMMA допингке қарсы ережелерінің 10.8.1-бабына сәйкес спорттан шеттетілу мерзімін бір жылға қысқартуға құқылы болды. Үш жылдық шеттету мерзімі 2026 жылғы 20 қазаннан 2029 жылғы 19 қазанға дейін белгіленді.
Бұдан бөлек, спортшының 2024 жылғы GAMMA әлем чемпионатындағы жеке нәтижелері жойылып, медальдары, ұпайлары мен жүлделері кері қайтарылады. Спортшының сынама алынған күннен (2024 жылғы 14 желтоқсан) бастап және одан кейінгі барлық жарыстағы жеке нәтижелері де жарамсыз деп танылады", - деп жазылған ұйым мәлімдемесінде.
Айта кетейік, допингке қатысты тексерістерге қарамастан, Зейнеп жарыстарға қатыса берген. Мәселен, қазанда ол жекпе-жектен Қазақстан чемпионы атанды.
Спортшының өзі әзірге әлеуметтік желіде антидопинг ұйымының үкіміне қатысты пікір білдірген жоқ.
Бұған дейін Азия ойындары кезінде қазақстандық желаяқ Аяна Болатбекқызынан алынған сынамадан тыйым салынған зат табылған болатын.