Кроссовка үшін алтыннан айырылды: Қазақстан сотқа жүгінді

Фото: ҰОК/ Арлан ОлжабайФото: ҰОК/ Арлан Олжабай

Қазақстанның Туризм және спорт министрі Ербол Мырзабосынов қазіргі уақытта ел өкілдері Ясмина Тоқсанбаеваның тыйым салынған аяқ киімге байланысты берілмеген Азия ойындарының алтынын қайтару туралы арбитраждық сотқа талап-арыз жолдағанын мәлімдеді, деп хабарлайды Tengri Sport.

Министрдің айтуынша, қазіргі уақытта Ясминаның медалі үшін күрес жалғасып жатыр.

"Бүгінгі таңда федерация Ясминаның ісі бойынша спорттық арбитражға құжаттарын жолдады. Сонымен қатар қазіргі ең басты мақсат - мұндай жағдайдың енді қайталанбауы үшін бар күш-жігерді салу. Сөзсіз, жауапкершілік бірнеше тарапқа жүктеледі: спорт комитетінен бастап, федерация, Ұлттық олимпиадалық комитет және спортшыны дайындау мен сүйемелдеуге тікелей қатысқандардың барлығы жауапты", - деді ол Орталық коммуникациялар қызметінде өткен брифингте.

Сонымен қатар министр бұл жағдайға кінәлілер әлі анықталмағанын айтты.

"Процесс аяқталғаннан кейін біз болған жағдайға толық баға береміз. Әрине, қателік жіберген адамдардың іс-әрекетін қарастырып, кінәлілерді жауапкершілікке тартамыз. Бірақ біздің басты ұстанымымыз - спортшыны қолдау. Спорттық мансап бір жарыспен аяқталмайды. Алда Олимпиада ойындары тұр", - деп атап өтті ол.

Айта кетейік, ҚР ҰОК біздің сауалымызға берген жауабында аяқ киімге қойылатын талаптар жеңіл атлетика федерациясы мен жаттықтырушылар штабына жеткізілгенін және олар осы талаптардың сақталуын қадағалауы тиіс болғанын түсіндірді.

Ясмина Тоқсанбаеваға не болды?

Еске сала кетейік, қазақстандық 21 жастағы спортшы спорттық жүрумен айналысады және бұған дейін 20 шақырым қашықтықта Азия чемпионатының күміс пен қола жүлдесін иеленген. Биылғы Азия ойындарында ол 42 шақырымдық марафонға қатысып, барлық қарсыласынан озып шыққан болатын.

Жарыс аяқталғаннан кейін Ясминаның чемпион атанбайтыны белгілі болды. Оның аяқ киімі регламентке сәйкес келмеген. Қазақстандық спортшы дисквалификацияланды.Тоқсанбаеваның нәтижесі жойылғанына қарамастан, Жеңіл атлетика федерациясы оған сыйақыны толық көлемде төлейтінін мәлімдеп, кейін пәтер кілтін табыстады.

Instagram-дағы бұл жарияланымды көру

TOXANBAYEVA YASMINA (@01yasm1na) жарияланымы

Азиадада алтыннан айырылған қазақстандық спортшыға қымбат сый жасалды